Skip to main content

Peqqusersiornerit ikittuinnaat atorlugit Pisiffik tigummiinnarneqarsinnaavoq

Tullianik suna Nuummut nuunneqassava? Taamatut isorinnittumik aperivoq Sisimiuni Siumup immikkoortortaqarfiata siulittaasua Lars Jørgen Kleist

Pisiffiup qullersaqarfia tamarmi 2016-imi marsimi Nuummut nuunneqassaaq. Niuertarfiutileqatigiiffik namminersortoq, norskinit qallunaanillu amerlanerussuteqarluni piginneqataaffigineqartoq tallimanngormat taamatut nalunaaruteqarpoq.

Ullumikkut marlunngornermi kommunimi politikerit siuttut ilaat qisuariaateqarpoq. Pisiffiup illoqarfimmi qullersaqarfiani maanna allaffissornikkut sulisuusut Sisimiut iluaqutigisorujussuuvai, taanna oqarpoq.

PIsiffiullu aalajangernera, suliffeqarfinnik amerlanerusunik Nuummut nuujoraanissamik ileqqorilikkap nuanniitsup ilagaa, Siumup illoqarfimmi immikkoortortaqarfiani siulittaasoq Lars Jørgen Kleist oqarpoq.

Ukiut marluk matuma siornatigut aallartippoq

– Kangerlussuarmi timmisartunut paasissutissiisarnermut centrali 2014-imi Nuummut nuunneqarpoq. Sunamitaava tullianik Nuummut nuunneqassava, taanna tusagassiorfinnut nalunaarummigut aperivoq.

Siumup Sisimiuni immikkoortortaqarfiata ajuusaarnartittorujussuuvaa Qeqqata Kommuniata ukiut marluk ingerlaneranni suliffeqarfiit angisuut marluk annaassammagit.

– Sisimiuni Siumut isumaqarpoq akileraartartut qaffasissumik ilinniagallit, minnerunngitsumillu ilaqutaasa, aamma suliffimminnik qimatsisussat, annaaneqarnerisigut Qeqqata Kommunia sakkortuumik eqqorneqassasoq, Lars Jørgen Kleist oqarpoq.

– Ukiut marluk ingerlanerinnaanni Qeqqani innuttaasut 60-t missaanniittut annaassavagut. Tamanna pissutigalugu akileraarutitigut isertitat ukiumut 10-15 millioner koruunit missaanni annassavagut, taanna oqarpoq, namminersorlutillu oqartussat kajumissaarlugit ingerlatsivik angisooq namminersortoq maanna illoqarfimmit peertussanngormat, ingerlataminnik sinerissamut nuunneqarnissaannut annertunerusumik iliuuseqarfigeqqullugit.

Immikkoortortaqarfimmi siulittaasup innersuussutigaa, kommunit kattunneqarnerannut atatillugu naatsorsorneqarsimasoq allaffissornerup sinerissamut siammarsarneratigut 220 millioner koruunit angullugit sipaarutigineqarsinnaasut.

Sisimiut iluaqutissatut allattugai

Sermitsiaq.AG-p Lars Jørgen Kleist, Pisiffiup aalajangernera qanoq iliuuseqarfigissaneraa pillugu oqaloqatigaa.

Suliffiit Nuummut nuunneqarnissaat pinngitsoorniarlugu kommunimit Pisiffik oqaloqatigisimavisiuk?

– Borgmester Hermann Berthelsen (Pisiffiup siulersuisuini ilaasortaasoq, aaqqiss.) ikinnerussuteqarsimavoq, qularutiginngilarali attuumassuteqarpallaannginnermi iluani ingerlatsiviup maaniiginnarnissaa sapinngisani tamaat anguniarsimagaa.

Qanoq isumaqarpit Nuummut nuussinnginnissamut suna aaqqiissutaasinnaagaluartoq?

– Isumaqarpunga illoqarfiusugut pilerinartoq, pissutigalugu meeqqerivinni inissanut utaqqisoqannginnatta, sulisut inissiaateqarpugut pitsaasunik, taavalu pinngortitarsuarput nalissaqanngilaq, aammalu qimusserneq snescooterernerlu kulturimut ilaalluinnartuullutik.

Nunamili maani sumiiffippassuaqarpoq alinaatsunik. Pisiffiup qullersaqarfia Qeqqata sunik allanik neqeroorfigisinnaagaluarpaa?

– Kisitsisiinnarnik ussassaarutissaqaruminaappoq. Akileraaruterput Qaasuitsup Kommunianit Kommunilu Kujallermit appasinneroreerpoq, Sermersuutullu atsigiinnarluni. Oqarusuppungali, illoqarfituaavugut qallunaanik sulisartunik pimoorullugu akulerutsitsiniartoq, illoqarfitsinnut nuuttut illoqarfimmiuinngortinniarlugit.

Pisiffiup qullersai maanna qanillattorniarfigisinnaanngilisigit, 2015-ip naalernerani nuunnissap aallartinneqannginnerani?

– Isumaqarpunga maanna kingusinaareersugut. Ukiup affaata 3/4-iatalu matuma siornatigut tusatsiareersimavara tamanna aalajangiunneqartoq. Imaassinnaavorli ingerlatsivik kommunimilu politikerit tamarmik ataatsimut isumasioqatigiissinnaasut, paasiniarlugu qanoq iliortoqarsinnaanersoq. Tamatumunnga atatillugu oqartariaqarpunga Inuit Ataqatigiit, Partii Naleraq Demokraatillu kommunimi inuussutissarsiornermut politikkimi saqqumilaanngippallaaqisut, Siumup Sisimiuni immikkoortortaqarfiani siulittaasoq Lars Jørgen Kleist oqarpoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER