aatsitassat
Peqquserluttoqarsinnaanera pinaveersaartinniarlugu politikkiliortoqarpoq
Aatsitassarsiorniarlutik suliartortussat nunatsinnut tikeralinnginnerini, peqquserluttoqarsinnaanera pinaveersaartinniarlugu Aatsitassanut Naalakkersuisoqarfik politikkiliorpoq
Aningaasaqarnermut aatsitassanullu naalakkersuisoq, Demokraatineersoq Anda Uldum, Naalakkersuisut peqatigalugit peqquserlunnikkut akilerneqartarneq akuersaanngiilluinnarlugu Aatsitassanut Naalakkersuisoqarfimmi politikkeqalerput.
Taama Namminersorlutik Oqartussat tusagassiuutinut nalunaaruteqarput.
Anda Uldum oqaluttuarpoq Aatsitassanut Naalakkersuisoqarfik malittarisassanik najoqqutassianik sakkortuunik arlalinnik suliaqarsimasoq, Aatsitassanut Naalakkersuisoqarfimmi peqquserlunnikkut akilerneqartarneq pinaveersaartissinnaajumallugu.
- Kissaatigaara sapinngisamik ammasumik ersarittumillu Aatsitassiornermut Naalakkersuisoqarfimmi sulisoqarnissaa, Anda Uldum taama oqarpoq.
Atorfilittat inuttut soqutigisaqassanngillat
Malittarisassani, Transparency Greenlandimut tusarniaassutigineqarnikuusuni, ilaatigut piumasaqaataavoq Aatsitassanut Naalakkersuisoqarfimmi atorfilittat suliassap suliarineqarnerani inuttut imaluunniit aningaasaqarnikkut soqutigisaqartuunissaat inerteqqutigineqarpoq, soorlu aamma atorfilittat ingerlatseqatigiiffinni Aatsitassanut Ikummatissanullu Naalakkersuisoqarfiup suliassaasa ataanni inissisimasuni aktiaateqaqusaanatillu ingerlatseqatigiiffiit pisortaani inissisimaqusaanatillu qanittumik attuumassuteqaqusaanngitsut.
Naalakkersuisoqarfiup peqquserlunnikkut akilerneqartarneq akuersaanngiilluinnarlugu politikkiani aamma atorfilittat aappamik qanigisamilluunniit soqutigisani aatsitassarsiornermut tunngasuni ilaatilernerisigut maleruagassanik saneqqutaarinninniarsinnaanerat aamma inerteqqutaatinneqarpoq.
Naalakkersuisoqarfimmit aamma tunissutit tunniussallu govmin.gl-ikkut tamanut saqqummiunneqartassasut aalajangiunneqarsimasoq, Namminersorlutik Oqartussat ilisimatitsipput.