Peqquserluttoq Afrikap kujataani tigusarineqartoq

Britta Nielsen, danskit inunnik isumaginninnermut aqutsisoqarfianni, 111 milliuunit koruuninik imminut iluanaarutigalugit peqquserlussimasoq, maanna tigusarineqarpoq.

Danmarkimi Inunnik Isumaginninnermut Aqutsisoqarfimmi 111 milliuunit koruuninik immineq iluanaarutigisaminik peqquserlussimasutut pasineqartup Britta Nielsenip qimaanera tamaanga killeqarpoq.

Afrikami kujataani ataasinngornermi ullaakkut tigusarineqarpoq.

Naalagaaffiup unnerluussisua, Aningaasanik Nunat Assigiinngitsut Akornanni pinerluttulerinermik suliaqartoq tusagassiutinut taama nalunaaruteqarpoq.

Peqquserlussimasutut pasineqartoq 64-nik ukiulik, Johannesburgimi inissiat ilaanni, ataasinngornermi ullaakkut arferngup qiteqqutileraa tigusarineqarpoq.

Afrikami oqartussat tigusarinninneranni danskit pinerlussimasunik misissuisartui peqataapput.

Danskit pinerlussimasunik misissuisartuisa misissuereernerminni paasissutissaataat atorlugit, tigusarinnittoqarsinnaasimasoq nalunaarutigineqarpoq.

Afrikap kujataani danskit aallartitaqarfia, misissuinermi oqartussanut pingaaruteqarluartunik paasissutissiisinnaasimavoq.

Britta Nielsen Inunnik Isumaginninnermi Aqutsisoqarfimmi 111 milliuunit koruuninik peqquserlussimasutut pasineqarpoq. Inunnik isumaginninnermi aqutsisoqarfimmi ukiuni 40-ni atorfeqarsimavoq, namminerlu kontominut aningaasanik nussuisarsimasutut pasineqarluni.

Aningaasat innuttaasunut aningaasatigut navianartorsiortunut agguangassatut immikkoortitat tigusiffigisarsimavai.

Suliaq oktobarip aallartilaarnerani avammut saqqummiunneqarmat nunat assigiinngitsut akornanni ujaarineqalersimavoq.

Tigusarinninneq suliami ingerlariaqqinnerusoq, Aningaasanik Nunallu Akornanni Pinerluttulerinermi politiinspektøri, Thomas Anderskov Riis isumaqarpoq.

- Qimaaneq tamaanga killeqarpoq. Pasisaq tigusarineqarpoq. Aningaasanik Nunallu Akornanni Pinerluttulerisut nunallu akimorlugit oqartussat allat suleqatigiinnerisa kinguneraat.

- Suliap naammassisinnaanissaa neriuutigisinnaalerparput – aningaasallu sinneri sumut pisimanersut paasisinnaalissallugu Thomas Anderskov Riis oqarpoq.

Britta Nielsenip Danmarkimukartinnissaa naalagaaffiup maanna qinnutigaa.

Suliami angut tigusarineqareernikuuvoq. Taanna tillitanik niuersimasutut pasineqarpoq, aningaasat allanut atorsinnaaneri pillugit peqataasimasut pasineqarami.

Taannattaaq Afrikap kujataani tigusarineqarsimammat Danmarkimukartinneqarnissaa qinnuteigineqarpoq.

Pineqartut saniatigut arnat marluk tillitanik niuersimasutut aamma pasineqarput. Taakkuli paarnaarunneqarnissaat suli piumaneqanngillat.

Britta Nielsenip saniatigut tillitanik niuersimasutut pasisat aqqi taaneqassanngitsut oqartussanit piumasarineqarpoq.

Powered by Labrador CMS