Demokraatineersoq Randi Vestergaard Evaldsen peqqissutsimut sillimmasiinerit pillugit apeqquterpassuarnik aperisimavoq.

- Erseqqissarneqassaaq qanoq amerlatigisut sulisitsisup akiligaanik peqqissutsimut sillimmasiinermut ilaanersut pillugit paasissutissaqanngitsoq, naatsorsuinerit nalorninartoqarput naatsorsuinerugallartutullu oqaatigisariaqarlutik, Aningaasaqarnermut Naalakkersuisoq Vittus Qujaukitsoq ilisimatitsivoq.

Akileraarutitigut isertitat

Naliliigasuarnera naapertorlugu ilimagineqarpoq inuit 10.000-t sulisitsisup akiligaanik peqqissutsimut sillimasiinermut ilaasut, sillimmasiineq ukiumut nalinginnaasumik 2000 kr-inik akeqarpoq, taamaasilluni akileraarutinit isertitassanit annaasat ukiumut 8-9 mio. kr.-t missaaniipput.

Randi Vestergaard Evaldsenip paaserusuppaa Naalakkersuisut eqqarsaatigisinnaaneraat inuinnartut peqqissutsimut sillimmasiinerit akileraartarnikkut ilanngaatigineqarsinnaanngortinnissaat.

Akivorlu apeqqutigineqartoq peqqinnissaqarfimmi aningaasartuutinik annertuumik misissueqqissaarnermi ilaasoq, misissueqqissaarnissamullu tassunga sulinissamut tunngavissaq suliarineqarnikuusoq. Misissueqqissaarneq 2020-mi ukiap tungaanut ingerlanneqassasoq Vittus Qujaukitsoq ilisimatitsivoq.

Immikkoortut

- Tunngaviusumilli maannakkut oqaatigineqareersinnaavoq inuit namminneq inuussutissarsiornermilu aningaasartuutaasa immikkoortinnissaat Kalaallit Nunaanni akileraaruseriaatsimi qitiusut ilagaat. Isertitanik akileraaruteqartussaatitaasunik naatsorsuinermi ingerlatsinermi aningaasartuutit ilanngaatigineqarsinnaasut tamannalu inuit namminneq aningaasartuutaannut atuutinngilaq. Inuit namminneq peqqissutsimut sillimmasiinermut aningaasartuutaat inuit namminneq aningaasartuutaat ilanngaatigineqarsinnaanngitsut. Taamaammat inuit namminneq peqqissutsimut sillimmasiinermut aningaasartuutaasa ilanngaatigineqarsinnaanerat atuutilersinneqassappat akileraaruseriaatsip tunngavianik annertoorujussuarmik allannguisoqartussaassaaq, aningaasaqarnermut naalakkersuisoq allappoq.

- Peqqissutsimut sillimmasiinerni inuit naammattumik isertitaqartartut Kalaallit Nunaanni Peqqinnissaqarfimmi utaqqisunut allattuiviit qaangiinnarnissaannut tunngaviusumik periarfissaqarput. Tamanna tulluartuunersoq tulluartuunnginnersorluunniit assigiinngitsunik isummerfigineqarsinnaavoq. Nunani allani misilittakkat takutippaat inuit namminneq peqqissutsimut sillimmasiinernik atorneqarnerisa annertussusia misissorneqarsinnaanermut katsorsarneqarsinnaanermullu tunngatillugu naligiinnginnermik kinguneqarsinnaasoq. Taamaalilluni isumaliutigineqartariaqarpoq inuit namminneq sillimmasiisarnerisa atorneqarnerulernera peqqinnissaqarfimmut akileraarutitigut aningaasalersorneqartumut tapiisarneq piffissami sivisunerusumi ajoqusissaneraa.

Angalanermut matussusiinertaqanngitsoq

Ullumikkut peqqissutsimut sillimmasiineq assersuutigalugu Danmarkimut katsorsartiffissamut angalanermut matussusiineq ajorpoq, tamannalu Vittus Qujaukitsumiit sianigeqquneqarpoq:

- Ilimagineqartariaqarpoq katsorsaanerpassuit peqqissutsimut sillimmasiinermit matussuserneqartussat nunani allani ingerlanneqartassasut. Kalaallit Nunaanni najugarisamit sumiiffimmut katsorsarneqarfissamut uterlugu angalanernut aningaasartuutit amerlasuunut annertuumik aningaasartuutaassapput. Pisut ilaanni ilimagineqartariaqarpoq najugaqarnermut aningaasartuutit aamma akilerneqassasut. Sillimmasiiniarnermik neqerooruteqartartut sillimmasiinerit allanngortippagit aningaasartuutillu taakku ilanngullugit, sillimasiinernut akiliutit qaffannerulissapput, tamannalu ilanngaasiisinnaanermi akileraarutinut tamarmiusut tunngatillugu aamma sunniuteqassaaq.