Peqqissutsimut ministeri ukiup affaanik kinguaattoortoqareersorlu: Qulaajaanissaq pingaartippara
Spiralilersuisimaneq pillugu suliap qulaajarneqarnissaa danskit naalakkersuisuisa kinguarsaraat Múte B. Egedep oqaatigaa, kisianni peqqissutsimut ministerip Sophie Løhdep (V) qulaajaanissaq pingaaruteqarnerarpaa.
Nassuiaanerit arlallit Danmarkip Kalaallit Nunaatalu ataatsimut oqaluttuarisaaneranni pitsaasut ajortullu qulaajaasut suliarineqartussaapput.
Ilaat spiralilersuinermut suliamut tunngavoq, taanna pingaartumik DR-ip podcastiliaani Spiralkampagnenimi qulaajarneqarluarpoq, ilaatigut piffissami 1966-mit ukiunilu tallimani arnanut naartusinnaasunut 9.000-nit Kalaallit Nunaanni najugaqartunut 4.500-nut spiralilersuisoqarsimasoq saqqummiunneqarpoq. Tassa arnanit akuersissuteqartitsilluni aamma akuersissuteqartitsinani.
Podcastip saqqummernerata kingorna danskit naalakkersuisui Naalakkersuisullu siorna juunimi suliap qulaajarneqarnissaa isumaqatigiissutigaat.
Aallartereertussaagaluartut
Aggustimi tusagassiortunik katersortitsisoqarnerani peqqissutsimut ministeriusimasup Magnus Heunickep aamma naalakkersuisup Mimi Karlsenip (IA) suliarisassat allassimaffiata aamma aningaasat septembarimi piareersimanissaat oqaatigaat, kiisalu misissuineq 2024-p naannginnerani piareerneqassasoq.
Kisianni tamanna ajornakusoorsinnaavoq, tassami qulaajaasussat suli pissarsiarineqanngillat. Tamatumalu Naalakkersuisut siulittaasuat Múte B. Egede (IA) naammagittarsinnaajunnaartippaa.
Danskit naalakkersuisuisa qulaajaanissaq kinguarsaraat, taanna isumaqarpoq.
- Tamanna akuersaanngilluinnarpara, qulaajaanermi ingerlanneqalereersimasussaagaluarpoq. Suliaq piaarnerpaamik aallartittariaqarpoq. Minnerunngitsumik arnat akuersaarneqarsinnaanngitsumik pineqarsimasut pillugit, ilaatigut Facebookimi taama allappoq.
Misissuisussat eqqortut nassaariuminaattut
Danskit nunamut namminermut peqqissutsimullu ministeriata Sophie Løhdep (V) isornartorsiuineq Sermitsiaq.AG-mut akerlilerlugu oqaaseqarpoq.
- Peqqissutsimut ministeritulli atorfeqalerama una pingaartittorujussuuara. Kalaaleq suleqatiga, Mimi Karlsen, arlaleriarlugu ataatsimeeqatigaara, qulaajaanerup aallartinnissaa naammassineqarnissaalu pingaartippakka, taanna akissuteqarluni allappoq.
Ministerip oqarnera naapertorlugu ilaatigut ukiup affaata matuma siornatigut qinersisoqarsimaneranik pissuteqarpoq.
- Novembarimi Folketingimut qinersisoqarpoq, tamatumalu kingorna ilisimatusartut eqqortut aamma naleqqunnerpaasut, suliap pisariaqartitaanik nassaarniarneq naatsorsuutigisamik sivisuneruvoq. Kisianni danskit naalakkersuisuisa suliamik matuminnga pingaartitsinerat qularineqassanngilaq.
Ilisimatusartut qulaajaasussat qanittukkut inissinneqarnissaat neriuutigineqartoq, danskit nunamut namminermut peqqissutsimullu ministereqarfiata marsip naanerani Sermitsiaq.AG-mut ilisimatitsissutigaa.