napparsimmaviit

Peqqissutsimut isumaqatigiissut nutaaq napparsimasunut 250-300-nut iluaqutaasoq

Sjællands Universitetshospital peqatigalugu aaqqiissutip nutaap, napparsimasut soorlu noqartartut aaamma sklerosertut 300-t tikkillugit pitsaanerusumik nakorsarneqartalernissaannut peqqinnissaqarfik neqerooruteqarsinnaalersippaa

Sianiuteqarfimmikkut nappaatillit, soorlu noqartartut, qarasasiakkut nakorsiartinneqarsinnaalerneq iluaqutigissavaat.

Sianiuteqarfimikkut nappaatillit ilaatigut ukiut arlertut immikkut ilisimasalimmit misissortinnissamut utaqqisariaqartarnerat tamaanga killeqarpoq, peqqissutsimut naalakkersuisoqarfiup tamanna oqaatigaa.

Atuaruk: Nakorsassaaleqineq pissutigalugu napparsimasut Nuummukartarput

Peqqinnissaqarfiup maanna Danmarkimi nakorsaanermik immikkut ilisimasalimmik nakorsiartitsisoqarluni nunatsinni sianiuteqarfimmikkut nappaatilinnut tamanut, sapaatip-akunneranut ataasiarluni nakorsiartitsisarneq neqeroorutigisinnaanngorpaa.

Nakorsat Sjællandimeersut
Peqqinnissaqarfiup Sjællandimi napparsimmavissuaq ilinniartitsinermut atatillugu universitetimik suleqateqartoq isumaqatigiissusiorfigineranik tamanna pissuteqarpoq.

Maannalu qarasaasiakkut nakorsiartitsinermik Roskildemi sianiuteqarfimmikkut nappaatilinnut immikkoortortaqarfimmit - Sjællandimi napparsimmavissuarmi ilinniartitsinermut atatillugu universitetimik suleqateqartumi immikkoortortat annersaanni nakorsaanernik immikkut ilisimasalinnik- suleqatigiissutissamik nutaamik, kalaallit napparsimasut misissortillutillu nakorsartinnissaannik qulakkeerisumik isumaqatigiissusiortoqarpoq.

Napparsimasunut 250-300-nut iluaqutaassasoq
Neqeroorutip nutaap sianiuteqarfimmikkut nappaatilinnut ukiumut 250-it 300-illu akornaniittunut iluaqutaanissaa naatsorsuutigineqarpoq.

- Tamanna napparsimasup utaqqivallaarani immikkut ilisimasalimmut nakorsiarsinnaaneranik, nappaammillu suussusersiniaanerup nakorsaanerullu ingerlateqqinneqarsinnaaneranik isumaqarpoq, nakorsat qullersaat Anne Marie Grell Ulrik oqaluttuarpoq.

Taassuma taama nakorsiartitseriaatsip napparsimasunit ilassilluarneqarsimanera erseqqissarpaa.

Pitsaanerpaamik nakorsaaneq immikkullu ilisimasalimmit ilitsersorneqarneq
- Isumaqatigiissut nutaaq iluaqutsiullugu nakorsaanermi neqeroorutigut amerlipput, aqutsisoqarfiup pisortaa Joanis Erik Køtlum oqarpoq, Sjællandimilu napparsimmavissuarmi ilinniartitsinermut atatillugu universitetimik suleqateqartumi sianiuteqarfimmikkut nappaatilinnut immikkoortortaqarfimmik toqqaannartumik attaveqarnerup naleqassusaata, kiffartuussinermut nalinginnaasumik annertuumik sunniuteqarnissaa erseqqissarlugu.

Atuaruk: Peqqinneq pillugu nalunaarusiami ilisimasat nutaat pissanganartut

- Taamaalilluni sulisutsinnik immikkut ilisimanik ilitsersuineq ilinniagaqassutsikkut nukittorsaaqataasoq isumaqatigiissummut aamma ilaavoq, pisortaq nassuiaavoq.

Isumaqatigiissut maajip aallaqaataani atuutilersussaq - sianiuteqarfikkut nappaatilinnik qarasaasiakkut nakorsiartitsinermut atatillugu, ulluni sisamani pikkorissarnerup Dronning Ingridip Napparsimmavissuani ingerlanneqartup naggataarneranut atatillugu, apriilip ulluisa arfernanni atsiorneqarpoq.

Ima qarasaasiakkut nakorsiartitsisoqartarpoq
Videokkut isiginnaarut atorlugu immikkut ilisimasalimmik oqaloqateqarneq, napparsimasoq najukkami napparsimmavimmiitillugu immikkullu ilisimasalik Roskildemi sianiuteqarfitsigut nappaatilinnut immikkut nakorsiartitsivimmiitillugu, ingerlanneqartassaaq.

Pisariaqarpat najukkami napparsimmavimmi oqalutsi peqataatinneqassaaq. Tamatuma saniatigut sianiuteqarfikkut nappaatilinnut immikkut attaveqaataasoq najukkamilu napparsimmavimmi ilinniartinneqarsimasoq peqataassaaq.

Atuaruk: Nakorsat sunngiffeqarnissaminnik amigaateqartut

Powered by Labrador CMS