Peqqissartut illuat: Init kisermaattariat marluuttarianngortinneqassapput
Københavnimi Kalaallit Peqqissartut illuanni nakorsiartut amerlanerit ineqartinneqarsinnaasariaqarput, taamaammat init marluuttariat amerlineqartussanngorput.
Københavnimi Peqqissartut illuanni inissanik amerlanernik pisariaqartitsisoqarpoq. Nakorsiartut amerlanerusut inissaqartikkumallugit init kisermaattariaasut qulit marluuttarianngortinnissaat pillugu oqaloqatigiittoqartoq, Peqqissutsimut Naalakkersuisoq, Martha Abelsen nassuiaavoq.
§37 atorlugu Bentiaraq Ottosenip (A) apeqquteqaataanut, akissummini taama allappoq. Bentiaraq Ottosenip apeqquteqaammini tikkuarpaa Københavnimut peqqissariartortartut amerlanerulersimasut.
Inimut akiliut akisooq
Init kisermaattariat qulit marluuttarianngortinneqarnissaannut aningaasat 100.000 koruunit atorneqartariaqartut, Martha Abelsen akissummini ilisimatitsivoq.
Taassuma saniatigut Peqqissartut illuat inissianik amerlanerusunik pissarsiniarpoq, allaffiillu inissiarsuup iluani allanut nussorlugit. Taamaaliornissarli Københavnip Kommuneata akuereqqaassavaa.
Allaffiit nussorneri inissianillu allanik pissarsinissaq qaavatigut 240.000 koruuninik inimut akiliuteqarnermik kinguneqassasoq, Naalakkersuisoq ilisimatitsivoq.