Peqqissartut Illuanni coronavirusertoqartoq
Kalaallit Peqqissartut Illuanni Københavnimiittumi coronavirusertoqarnera paasineqarpoq. Napparsimasoq qanigisaalu maanna Rigshospitalimi mattusimaneqartut uninngavianniipput
MALUGIUK: Nal. 17,24 nutarterneqarpoq, aaqq.
Taama peqqissartut illuanni uninngasumut ingiallortaasoq Sermitsiaq.AG-mut paasissutissiivoq.
- Tallimanngornermi ullup-qeqqata siornatigut peqqissartut illuata ningiuanit Birthe Biancomit ilisimatinneqarpugut, ineqartut ilaannik tunillatsittoqarsimasoq. Tamatta ullup ingerlanerani coronavirusimut misissortippugut – inullu ataaseq mattusimaneqartussanngortinneqarluni, ineqartoq kinaassutsiminik isertuussiumasoq oqaluttuarpoq. Aaqqissuisoqarfimmit taassuma aqqa ilisimaneqarpoq.
Namminersorlutik Oqartussat tusagassiuutitigut nalunaarummi uppernarsarpaat "Københavnimi Kalaallit peqqissartut illuanni napparsimasoq ataaseq qanigisaasorlu ataaseq covid-19-imik tunillatsissimasut. Napparsimasoq maannakkut Rigshospitalimi mattunneqartunut immikkoortortaqarfimmut nuutsinneqarsimavoq, peqqissartut najugaqarfiat napparsimasumut tunillaassortumik nappaatilimmut naleqqutinngimmat".
- Napparsimasoq angerlamut aallariartorneranut atatillugu Kalaallit Nunaannut angalasut allat assigalugit ileqquusumik misissorneqarpoq. Napparsimasoq Danmarkimut katsorsartikkiartorsimasoq, Københavnimi Kalaallit peqqissartut illuanni sapaatip-akunnerit marluk missaanni najugaqarsimavoq, tusagassiuutitigut nalunaarummi oqaatigineqarpoq.
Maleruagassat pingaartinneqartut
Københavnimi Kalaallit peqqissartut Najugaqarfianni tunillatsittoqarsimasunik nassaarnerup kingorna, eqqiluisaarnermut nerisarfimmi issiaviit akornanni ungasissusaat, pinaveersaartitsinerillu allat pillugit immikkut ileqqorisassatut maleruagassat ukkanneqarsimapput, tusagassiuutitigut nalunaarummi allassimasoqarpoq.
- Kalaallit peqqissartut Najugaqarfianni napparsimasut sulisullu tamarmik Rigshospitalimi covid-19 virusimut misiligummik tigusiffigineqarnikkut misissorneqarnissamut maanna periarfissaqalerput. Aamma allat qanigisaasut ilanngullugit tunillatsissimasinnaasut misissorneqarnissaminnut neqeroorfigineqarput.
Namminersorlutik Oqartussat paasissutissiipput, taamatut pisoqarnissaa "naatsorsuutigineqareersimasoq".
- Danskit inuiaqatigiit akornanni Covid-19-p taama annertutigisumik siammaanneqarsimanera eqqarsaatigissagaanni tunillatsinnissaq pinngitsoorneqarsinnaasimanngilaq. Kalaallit peqqissartut Najugaqarfiat piareersimasimavoq, taamatullu pisoqarnissaanut qanoq iliuuseqarnissamut pilersaarusioreersimalluni. Kalaallit peqqissartut illuat napparsimasunut mattunneqartariaqartunut najugaqartitsinissaminut atortorissaarutaateqanngilaq.
Napparsimasut 46-t
Peqqissartut illuat maannakkorpiaq napparsimasunit 46-nit kiisalu qanigisaasunit ingiallortaasunillu 20-nit najugaqarfigineqarpoq. Nualluutip atuunnerata aallartinneranit qanigisaasunut matoqqatinneqalerpoq, inuilli 20-t matusisoqannginnerani Danmarkimeereersimallutik.
Københavnimi Kalaallit Peqqissartut Illuata ningiua Birtha Bianco aamma Peqqissutsimut Pinaveersaartitsinermullu Aqutisoqarfiup pisortaa, Malene Nielsen, Sermitsiaq.AG-mut oqaaseqarusussimanngillat.