Peqqissaavik sivisuumik utaqqititsisarunnaarniarpoq
Nuummi innuttaasut Peqqissaavimmi sulisunik oqaloqateqarnissaminnut akunnerpassuarni sianerlutik utaqqisariaarupput. Piffissamik inniminniinissamut suliniut nutaaq eqaannerusoq atulersinneqaqqammersoq ingerlalluartoq, qitiusumik peqqissaaveqarfimmi nakorsap nalilerpaa.
- Utaqqisuni normu 99-iuvutit.
Nuummi innuttaasunut oqaaseqatigiit taakku isumaqartariaarupput akunnerpassuarni utaqqisariaqalernermik, Dronning Ingridip Peqqissaaviani nakorsamik peqqissaasumilluunniit oqaloqateqarnissap tungaanut.
Peqqissaavimmimi piffissamik inniminniinissamut suleriuseq allanngortippaat, nakorsamik oqaloqateqarumallutik sianertut paasissutissaataat ullaakkut piumasalerlugit, kingornalu nakorsamik sianertoqarnissaanik ilisimatitsisalerlutik.
- Innuttaasut sianeraangata utaqqerujussuartarneq atorunnaarsikkusupparput. Maanna misilipparput innuttaasup sianernerani inuup normuanik oqarasuaammillu sianerfissamik piniapallattarluta. Ullup ingerlanerani taava nammineq sianerfigisarparput. Allannguut maannamut ingerlalluarpoq, qitiusumik peqqissaavimmi nakorsaq, Jesper Olesen Sermitsiaq.AG-mut oqaluttuarpoq.
Sulisut amerlineqanngillat
Qitiusumik peqqissaavimmi nakorsap nassuiaatigaa peqqissaavimmi sulisut amerlineqanngitsut, sulisulli allatut suleriuseqartinneqalersut.
Nakorsap erseqqissarpaa innuttaasup nakorsiarnissaminut ersiutit pigisani eqqarsaatigereersimasariaqarai, nakorsap sianernissaanut nassuiaanissamut piareersimaniassagami. Soorlu ersiutit suunersut, qanoq sivisutigisumik atorsimanerlugit, ersiutit siornatigut misigereersimanerlugit kiisalu nammineq qanoq iliuuseqarniarsimanerluni. Taamaasilluni nakorsamik oqaloqateqarneq nalilersuinerlu piaartumik ingerlanneqarsinnaasassaaq.
- Aamma pingaaruteqarpoq innuttaasup nakorsamik sianerfigitikkuni ullorsiutiminut allattuinissaa. Piffissamik tunineqarsimaguni ullorsiummut allannissaa pingaaruteqarpoq. Nakorsiartussat takkutinngitsoortarneri suli ajornartorsiutigisarpagut, naak takkutinngitsoortartut ikiligaluartut, Jesper Olesen oqarpoq.
Sianertut tamarmik angumerineqanngitsooratarsinnaasut
Nakorsiarnissamut piffissamik inniminniisussat paasissutissaminnik tunniussiinnartalernerisa kingunerisinnaasaasa ilagaat nakorsiarniarluni ullaakkut sianersimasoq nakorsamit sianerfigineqanngitsoortoq. Piffissarmi atorneqartoq sulisullu suli taakkuinnaammata.
- Sulisugut killeqarput. Imaassinnaasoq nakorsiarniartut ilaat ullormut sianerfiginngitsoorigut piffissaatigut tamakkerlutik inniminniiffigineqarsimammata. Tamanna maannakkorpiaq misigaarput, tassami ulluni qaninnerni coronamik tunillatsissimasut ataatsikkut 17-it paasineqarput. Taakkulu pissutigalugit aamma sianertut amerlanerupput. Nakorsamik sianerfigineqarsimanngikkuit, aqaguani misileeqqissinnaavutit. Taamaattoqarnera ajuusaarnaraluarpoq, allatulli ajornarallarpoq, Jesper Olesen ilisimatitsivoq.
Innuttaasut kissaataat
Suliniut, piffissamik inniminniinerup pilertornerulernissaa nakorsallu nammineq sianertalernissaa, innuttaasut ilaasa kissaatigisimavaat. Peqqissaavik ukiualuit matuma sioarna innuttaasunit apersuisimavoq, innuttaasunik sullissinerup pitsaanerulernissaanut qanoq iliuuseqarsinnaaneq pillugu. Tassanilu piffissamik inniminniinerup allanngortinneqarnissaa kissaatini ilaasimavoq, piffissamik inniminniinissami utaqqivallaartarneq pinngitsoortinneqarumalluni.
- Kissaatigineqartoq maanna naammassivarput. Innuttaasut aalajangersimasumik nakorsaqartinneqartarnissaat aamma soqutigisinnaavarput. Peqqissaavimmili sulisut tamarmik immikkut piginnaasaqarput immikkullu ilisimasaqarlutik. Kisianni aalajangersimasumik nakorsaqartalernissaamut isuma pigigaluarparput, oqarpoq.
Piffissamik inniminniinissamut suliniut nutaaq sapaatip akunnerata siuliani atulerpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...