Peqqissaasut tunillatsinnissamut ernumasut: Sulilerlaat ilaat mattusimaqqaarneq ajorput

Peqqissaasut Kattuffiat, PK peqqissaasunit arlalinnit allakkatigut oqarasuaatikkullu saaffigineqaqattaarpoq. Taakku ernumapput sulinermik nalaani coronavirusimik tunillatsilerasualutik.

Saaffiginnissutit nunatsinni sumiiffinni arlalinninngaanneerput.

- Taakku misigisarpaat suleqatinut nutaanut Namminersorlutik Oqartussat mattusimaqqaarnissamik maleruaqqusaat atuuttannginnerat. Suleqatitaarineqartut ulloq siullermi, tassa tikiinnavillutik suliartorsinnaapput, PK-mi siulittaasoq Ken Jensen, Sermitsiaq.AG-mut oqarpoq.

Peqqissaasut Kattuffiat isumaqarpoq peqqinnissaqarfimmi sulisut tikerlaat ilaat ulluni tallimani mattusimaqqaanngikkaluarlutik suliartuinnarsinnaanerat peqqinnissakkut ulorianartorsiortitsingaatsiartoq.

Peqqinnissakkut ajunaarnersuusinnaasoq

Ataavartumik atorfeqartut assigiinngitsut peqqutigalugit Danmarkimut angalasimatillutik tikinnermi ulluni tallimani mattusimaqqaartussaatitaapput. Sulilersulli nutaat inuiaqatigiinnut pingaarutilimmik suliaqartutut nalilerneqarlutik Peqqinnissaqarfimmi aqutsisunit immikkut akuerisaallutik ingerlaannaq sulilersinnaasarput.

PK tusagassiorfinnut nalunaarutimini Sermitsiaq.AG-mut nassiussimasamini piumasaqarpoq peqqinnissaqarfimmi sulisunut assigiimmik maleruagassaliortoqassasoq. Sermitsiaq.AG-mut nassuiaavoq sulisut ersarissunik assigiittunillu malittarisassaqarnissaat pingaaruteqartoq.

- Tamanut assigiimmik maleruaqqusaliortoqartariaqarpoq. Sulisut ataasiakkaat maleruaqqusanut paatsuugannginniassammata, PK-p siulittaasua Ken Jensen oqarpoq.

- Taama immikkoortitsineq inissaminiinngilaq, peqqinnarani, akuerineqarsinnaanani, peqqinnissaqarfimmullu ilungersoreeqisumut suli tatisineruinnarluni, oqarpoq.

Ulluni tallimani mattusimanissamut atuutsitsisannginneq PK-mit isornartorsiorneqarpoq:

• Peqqinnissaqarfimmi sulisut allat tunillatsissinnaanerisa annertusinera naleqqutinngitsoq PK isumaqarpoq. Tassanngaanniillu nammineq ilaquttanik tunillaasinnaanissaq annertusilluni.
• Uninngasut sanngiiffeqareersut tunillatsissinnaanerisa annertusinerat
  ajornartorsiutitut annertuutut PK-p isigaa. Innuttaasut isumannaatsumik
  pineqarnissaannik ajoqusiineq akuerineqarsinnaanngilluinnartutut isumaqarfigaat.
• Atorfinerlaat suleqatinut napparsimasunullu tuniluutitsilersinnaasutut naapertuilluanngitsumik akisussaaffilernissaat kukkunerulluinnartoq, PK isumaqarpoq.
• Sulisut angerlarsimaannarallarnissaannut akisussaaffik angisooq Peqqinnissaqarfimmi qullersat tigussagaat, PK isumaqarpoq.

- PK isumaqarpoq peqqinnissaqarfiup qullersaqarfiata akisussaaffimmik tigusinissaq tulluarissagaluaraa, maleruagassaliorlunilu ersarissunik, immikkoortortaqarfimmi aqutsisut ataasiakkaat peqqinnissakkut ajunaarnersuaqarnissaanut akisussaatitsiinnarani, PK tusagassiorfinnut nalunaaruteqarluni allappoq.

Isornartorsiuineq piumasallu saqqummiunneqarput

Nunatsinnut angalanermi nalunaarut atuuttoq naapertorlugu peqqinnissaqarfimmi sulisunut tunngatillugu Nakorsaaneqarfik aalajangertassaaq nalunaarut tamakkiisumik imaluunniit ilaannakortumik atuutsinneqassanersoq. Peqqinnissaqarfimmi qullersat immikkut akuersissut tunniuttassavaat.

Sermitsiaq.AG Peqqinnissaqarfimmi qullersat aamma Nakorsaaneqarfik saaffigisimavaa uppernarsaqqullugu sulilerlaat ilaat ulluni tallimani mattusimaqqaaratik sulisalertarnerat pillugu.

Sermitsiaq.AG-p ilanngullugu Peqqissaasut Kattuffiata isornartorsiuinera piumasaalu Peqqinnissaqarfimmi qullersat aamma Nakorsaaneqarfimmut saqqummiussimavai, akissutisinissarlu utaqqillugu.