Peqqissaasoq: Kiffaanngissutsinnik ingasaassilluni atuineq

Sapaatip akunneranut nalunaaquttap akunnerini 40-ni, suliartoqquneqarnissamullu sillimanermi nalunaaquttap akunnerini 16-ini sulisarneq, tassa pigaartut oqarasuaataat sianeraangat pilattaasumut piaanerpaamik ikiuukkiartorluni sulisarneq Ninna Thorngaardip suliffimmini ulluinnarsiutigai.

Maannamut suliartoqquneqaratarsinnaanermut pigaartuusarnermini ukiumut 200 aamma 300 tiimit qaangiuttoorsimanermut taarsiullugu sulinngiffeqartaluni.

- Nalunaaquttap akunnerpassuini sulisarnera maannamut naammagisimaarsimavara, qaangiuttoornermut taarsiullugu sulinngiffeqarnissamut periarfissaqartarama ilaquttakka ikinngutikkalu ilagisinnaallugit, Ninna Thorngaard Sermitsiaq.AG-mut oqaluttuarpoq. Taanna isumaqarpoq siunnersuut aqqutigalugu kiffaanngissuseqarnissamut pisinnaatitaaffini atornerlunneqartut.

Pigaartuulluni tiimerisat qaangiuttoornermut taarsiullugit sulinngiffeqaataasartut

- Sulisitsisunnit maanna piumasaqaatigineqarpoq, pigaartuuninni tiimerisakka aningaasanngorlugit tigussagikka, tassa aningaasarsialeriffik suliartoqquneqarnermi qaangiuttoornermiluunniit tiimit sulinngiffeqaatissat naatsorsorniarneranni teknikkikut ajornartorsiuteqarsimammat, aqutsisullu isumaqarlutik sulisutut soraarnissamik eqqarsaateqaraanni tamatuma atorluarneqarnissaannik ”eqqarsaasersortoqarsinnaasoq”, pilattaanermi peqqissaasoq nassuiaavoq.

Sulisutut qanoq ”aaqqissuussaassutsimik atorluaasoqarsinnaanera” paasiuminaatsippaa.

- Sulisoq tassaavoq qaangiuttoornermut taarsiullugu sulinngiffeqaatissanik katersisisartoq, tamannalu taamaallaat pisinnaavoq qaangiuttoorsimagaanni suliartoqquneqarsimagaanniluunniit, peqqissaasoq erseqqissaavoq.

Allannguutissatut siunnersuutigineqartoq akuerineqassappat Ninna Thorngaard 40 tiimini sulisarnerup suliartoqquneqarnermilu 16 tiimit sulisarnerup qaavatigut tiimit 200-nit 300-t angullugit sulisalissaaq. Tamanna qaangiuttoornermut taarsiullugu sulinngiffeqarnissamik aningaasarsissutiginissaanilluunniit kiffaanngissuseqarluni nammineq aalajangersinnaaneranut naapertuutinngilaq.

Ingerlatsinerlunneq

- Aningaasarsiat eqqarsaatigissagaanni, suliartoqquneqarnermi qaangiuttoornermut taarsiullugu sulinngiffeqarneq tiimimut 34 koruuninik sulisitsisoq aningaasaruuteqartarpoq. Ukiut 30-t matuma siorna aamma taamaappoq. Aningaasarsiakka ukiut sisamat ingerlaneranni 5,5 procentimik qaffanneqassasut allassimavoq. Aningaasarsiassat kingullermik isumaqatigiissutigineqarmata qaammammut piginnaasaqarnermut tapisiarisartakkakka 1500 koruunit annaavakka, Ninna Thorngaard oqarepoq nangillunilu:

- Piffissaq suliffigisassara sivitsorpoq, aningaasallu ukiumut 1,5 procentimik naleerukkiartortarnera eqqarsaatigissagaanni aningaasarsiakka annikinnerulerlutik.

Nalunaarutini naggaserlugit oqaatigaa, sulinermi atugassarititaasut pitsaasuunissaannik piffssallu suliffiusussap naammaginartuunissaanik taamaallaat piumasaqarluni.

Aqutsisunut piumasaqaatit

Siuliani oqaatigisami saniatigut kissaatigai:

Aqutsisut, pilattaavimmi sulisarnerup inuillu inuunerannik naleqarsinnaasumik suliaqartarnerup qanoq ittuuneranik paasinnissinnaassuseqarnissaat.

Aqutsisut, suliartoqquneqartarnerup qanoq nassataqarsinnaaneranik, aamma nalunaaquttap akunnerpassuini sulisimanermit qasusarnerup napparsimasunut qanoq kinguneqarsinnaaneranik paasinnissinnaassuseqarnissaat.

Aqutsisut, aningaasarsiaqartitsisarnerup ajunngitsumik ingerlanneqarnissaanik piumasaqaateqartarnissaat, aaqqissuussaassutsimillu sulisunut naleqqussaasarnissaat, tassa sulisut aaqqissuussaassutsimut atorsinnaanngisumut naleqqussarnagit.

Aqutsisut, sulisuminnut tatiginninnermik ataqqinninnermillu takutitsisarnissaat.

Aqutsisut, sulisunut tusarnaartarnissaat, tamanullu iluaqutaasussamik aaqqiissutissarsiornermi suleqataasarnissaat.