Peqqissaasoq akiuussutissamik kapitittoq: Sulininni qaammatit qulit pikkunarnerpaat
Jyllandip Avannaani peqqissaasoq akiuussutissamik kapitikkaluarluni illersuutinik atuinerminik qasukkaammisitsinianngilaq
Elna Vinther Sørensen Aalborg Universitetshospitalimi coronamik napparsimallutik uninngasunik ulluinnarni paarsisarpoq.
Peqqissaasutut suliffini tunngavigalugu nammineq tunillatsinnissamut aarlerinartorsiortuuvoq.
Maannali peqqissaasoq Jyllandip Avannaani napparsimmavimmi ukiut 27-t matuma siorna atorfinitsinneqartoq eqqissisimanerulaarluni suliartorsinnaanngorpoq.
Sapaammi ullup-qeqqata siornatigut Danmarkimi siulliit ilaattut covid-19-imut akiuussutissamik kapitippoq.
- Annernanngitsumik pivoq, taamaassimanngikkaluarpat maani oqaloqatigisimanavianngikkaluarpagit, illarluni oqarpoq.
Nappaalanersuup annertussusia paasiuminaatsoq
Elna Vinther Sørensenip Danmarkip nappaalanersuarmit eqqugaaneraniit piffissaq ingerlasimasoq kingumut qiviaraangamiuk imminut tallimigut pussuttariaqartarpoq.
- Ukioq ulapaarfiusorujussuusimavoq. Sulisariaqarsimavugut tamatumalu peqatigisaanik periaasissanik nassaarniartariaqarsimalluta.
- Ullut ilaanni ilaatigooriarluni angerlarluni eqqarsartoqartarpoq: Qanoq iliussanerlunga maanna paasivara.
- Kisianni aqaguani aallaqqaataaniit aallarteqqittariaqartarpoq, misissugassat suli amerlanerujussuit suliassaralugit.
Qaammatit kingulliit qulit ingerlatsimasut napparsimmavissuarmiissimanermini pikkunarnerpaatut oqaatigissallugit nangaajallanngivippoq.
- Nualluummik nappaalanernik misigisaqartarsimavunga, ulapaarfiusorujussuarnik misigisaqartarsimavunga. Kisianni matumatut ittumik misigisaqanngisaannarsimavunga.
- Aamma allaanerussutigaa suliffimmiinnaanngimmat, kisiannili nunarsuaq tamakkerlugu atuuttuummat, Elna Vinther Sørensen oqarpoq.
Malerugassani allannguuteqassanngilaq
Akiuussutissamik taama sukkatigisumik ineriartortitsisoqarsinnaasimanera nuannaarutigaa.
- Qaammatit qulit matuma siorna aallartippoq, maannalu akiuussutissaqalersimavugut. Isumaqarpunga tamanna ajunngilluinnartuusoq.
Tamannali maannamuugallartoq ulluinnarni allannguutinik annertuunik kinguneqarnavianngilaq.
- Ilaatigut akiuussutissap immikkoortuata aappaa suli amigaatigaara, ilaatigullu akiuussutissamik kapitissimagaluarlunga tunillannartumik allanut ingerlatitseqqissinnaanersunga naluarput.
- Taamaattumik illersuutinik atuininnut qasukkaammisitsinavianngilaq, Elna Vinther Sørensen oqarpoq.
Utoqqaat illuini najugaqartut sulisullu siulliunneqassasut
Region Nordjylland nassiussani siullerni akiuussutissanik immikkoortunik 975-inik tigusaqarsimavoq.
Akiuussutissat pingajorarterutaat marluk utoqqaat illuini najugaqartunut neqeroorutigineqassapput, pingajorarterutillu kingulliit Aalborg Universitetshospitalimi aamma Hjørringimi regionshospitalimi sulisunut napparsimallutillu uninngasunut neqeroorutigineqassallutik.
Regionimit sapaatip-akunnerini aggersuni akiuussutissanik immikkoortunik 5000-ingajannik sapaatip-akunneranut tigusaqartarnissaq naatsorsuutigineqarpoq.
Taamaalilluni utoqqaat illuini napparsimmavinnilu akiuussutissamik kapuuinerit sukkanerusumik ingerlanneqarsinnaanngussapput.