Peqqinnissaqarfiup aaqqissuussaanera allanngortinniarlugu Martha ilimasaaruteqarpoq
Nunatsinni peqqinnissaqarfimmut innuttaasut qanoq naatsorsuuteqarsinnaassappat? Peqqinnissaqarfiup suliassat suut isumagissavai? Apeqqutit taakku marluk Peqqinnissamut Naalakkersuisup, Martha Abelsenip, akissutissarserusuppai.
Nakorsat, peqqissaasut nunatsinnilu peqqinnissaqarfinni sulisut allat amigaatigineqangaatsiarput, ajornartorsiutillu imaaliallaannaq aaqqinneqarsinnaarpasinngillat. Pissutsit taama itsillugit Martha Abelsen erseqqissaassuteqarpoq peqqinnissaqarfiup iluani sullissineq pillugu allakkiortoqassasoq, pissutsit piviusut tunngavigalugit suliaasumik.
Peqqinnissaqarfik ukiut qulit matuma siorna nunap immikkoortuinut aggulunneqarluni aaqqissuuteqqinneqarpoq, suliassallu suliaqartunit akisussaassuseqartumik siunissami suliarineqartalernissaat pillugu maanna pilersaarusiortoqarnissaa, Martha Abelsenip pisariaqarsoraa, taamaasiornikkut sullissinerit innuttaasunut ersarinnerulerniassammata.
Aaqqiissutaasinnaasut allat
- Peqqinnissaqarfiup nakorsat taartaasut piffissami sivikitsumi atorfinitsittariaqartarmagit akilikkatsinnut naapertuuttumik pitsaasumik sullinneqartarnersugut misissorneqartariaqarlunilu eqqartorneqartariaqarpoq, aamma aaqqiissutaasinnaasut allat eqqartorneqartariaqarput, Martha Abelsen tusagassiutinut nalunaarummini erseqqissaavoq.
Taassuma ilisimatitsissutigaa soqutigisaqaqatigiit susassallit, tassunga ilanngullugit Inatsisartut, kommunit, NGO-t innuttaasullu peqqinnissaqarfimmut naatsorsuutinik eqqartuinermut akuliutitinneqarnissaat.
Peqqinnissaqarfiup atorfinitsitsinermut aningaasarpassuit atortarpai, sulisussaarunnerlu aamma aningaasartuutaangaatsiartarluni. Sulisoqarnermut tunngatillugu allannguutit peqqinnissaqarfimmit aalajangiiffigineqartuartarput taamaattumillu suliassamik isumaginnittarneq qanoq naleqqunnerpaamik aaqqissorneqassanersoq ukkatarineqartariaqarluni
Nakorsat immikkut ilisimasallit amigaatigineqartut
Nakorsat suleriaasiat ineriartupiloorpoq immikkullu paasisimasaqarnissaq ukkatarineqarnerujartuinnarluni, tamatumani nakorsanik nakorsaanermik nalinginnaasumik piginnaasaqarfilinnik amerlanerusunik atorfinitsitsiniarneq ajornakusuulersimavoq. Nakorsallu taakku Kalaallit Nunaanni pisariaqartinneqarnerpaapput. Taakku saniatigut kalaallit nakorsanngorniarlutik ilinniartut ukiualuit ingerlanerinnaani 30-niit qulinut ikilisimapput, tamannalu peqqinnissaqarfiup aarlerinartutut aamma isigaa.
Martha Abselsen sisamanngormat ilisimatitsissutigaa ukiamut isumasioqatigiissitsinissaq pilersaarutigalugu, tassanilu politikerit soqutigisaqartullu allat peqqinnissaqarfik pillugu naatsorsuutiminnik oqaloqatigiissapput.