Peqqinnissaqarfinni sulisut akissarsiaannut isumaqatigiissut inissippoq

Kalaallit Nunaanni peqqinnissaqarfiup iluani sulisut 700-ngajaat isumaqatigiissummut, Namminersorlutik Oqartussat, kommunit PPK-llu isumaqatigiissutigisaanut, attuumassuteqarput.

Patient, sygeplejerske

Namminersorlutik Oqartussat, kommunit Peqqinnissarlu pillugu kattuffiit ulluni aqqaneq-marlunni isumaqatiginniangaatsiareerlutik, peqqinnissaqarfinni atorfillit sulisullu 700-ngajaat atorfeqarnerminnut isumaqatigiissutaat nutaaq ukiuni sisamani atuuttussaq isumaqatigiissutigisinnaanngorpaat.

Namminersorlutik Oqartussat tusagassiutinut taama nalunaaruteqarpoq.

- Isumaqatiginninniarnerit angusaqarusussuseq aallaavigalugu sakkortuumik ingerlanneqarput. Isumaqatiginninniartut tamakkerlutik suleqatigiilluarsimapput, illuatungeriillu piumasaqaatiminnik annikillisitsisariaqartarsimallutik, PPK-mi siulittaasoq Ken Jensen, kattuffiit arfineq-marluk sinnerlugit isumaqatiginninniaqataasoq aamma isumaqatiginniartarnermi pisortaq Frederik Schmidt sulisitsisut sinnerlugit isumaqatiginniaqataasoq, tusagassiutinut nalunaarummi taama oqarput.

Atorfinitsitsisarneq sulisullu sulisoriinnartarneri

Peqqinnissaqarfiit atorfinitsitsiniarnermi sulisullu sulisoriinnarnissaannut unammilligassaqartartut isertorneqarsinnaanngilaq. Taamaattumik sammisat atorfinitsitsisarneq aamma sulisut sulisoriinnartarneri isumaqatigiinniarnerni qitiulluinnarput.

Isumaqatigiissutivinni peqqinnissaqarfimmi sulisut tunngaviusumik akissarsiaat qaffariarput soraarnerussutisiassanullu annertunerusumik akiliuteqartalerlutik. Tamatuma saniatigut angajoqqaanngorlaat akissarsiaqaannarlutik sapaatit akunnerinik marlunnik sivisunerusumik sulinngiffeqarsinnaalerput, taamaasillutillu PPK-mi ilaasortat Kalaalit Nunaanni kattuffinni isumaqatigiissuteqarfigineqartartuni sivisunerpaamik erninermut atatillugu sulinngiffeqartalerlutik, tusagassiutinut nalunaarummi ersersinniarneqarpoq.

Aammali ilinniartitaanernut tunngassuteqartut annertunerusumik suliniuteqarfigineqassasut, pisortanut tunngasut ukkatarineqarnerulissasut allaffissornerlu pisariillisarneqassasoq, illuatungeriinnit tallimanngornermi januarip 31-ani unnukkut atsioqatigiissutigineqarpoq.

Taasititsissutigineqassaaq

Isumaqatigiissut peqqinnissaq pillugu kattuffiup ilaasortaanit taasititsissutigineqartussanngorlugu nassiunneqareerpoq, kingornalu Naalakkersuisunit aamma akuerineqaqqaalluni. Isumaqatigiissulli akuerineqarpat, aprilip aallaqqaataani 2020-imi atuutilissaaq, martsillu 31-anut 2024-imut atuutissalluni.

Taasisitsinermit angusat martsimi pissarsiarineqarsinnaanissaat naatsorsuutigineqarpoq.

Powered by Labrador CMS