Peqqinnissaqarfimmut immikkut aningaasaliinissaq ataatsimiititaliap akueraa
Peqqinnissaqarfimmut immikkut aningaasaliinissaq aningaasaqarnermut akileraartarnermullu ataatsimiititaliap pingasunngormat akueraa. Immikkut aningaasaliissutit suli annertussusilerneqanngillat.
Europamisut nunatsinni coronavirusimik sakkortuumik eqqorneqassagaluarutta, peqqinnissaqarfik annertuumik suliassaqarpoq. Naalakkersuisut Aningaasaqarnermut Akileraartarnermullu ataatsimiititaliamut kaammattuipput peqqinnissaqarfimmut immikkut aningaasaliinissamut, suli annertussusilerneqanngitsumut, akuerseqqullugit.
Naalakkersuisut innersuussutaat ataatsimiititaliap pingasunngormat suliaraa akuersissutigalugulu, malitsigisaanilli aningaasaqarneq pillugu aamma apeqquteqarlutik.
Peqqissutsimut naalakkersuisoqarfimmi pisortaq Tine Parsip peqqinnissaqarfik maannamut qanoq aningaasartuuteqareersimalernersoq pillugu Sermitsiaq.AG-mut oqaaseqarsinnaanngilaq.
- Oqaatigissallugu siusippallaarpoq. Misissugassat assartorneqarnerinut napparsimasullu angallannerinut allanullu tunngatillugu isumaqatigiissusiornerit aatsaat aallarteqqammerpagut.
Aningaasaliissutissat killilerneqanngillat
Aningaasaqarnermut Akileraartarnermullu ataatsimiititaliap akuersinerata malitsigisaanik, aningaasanut inatsimmi konto pingaarneq nutaaq, “Coronavirus pissutigalugu immmikkut ittumik iliuuseqarnernut aningaasaliinerit” aningaasartalereerneqanngitsoq ilanngunneqarpoq.
Nassuiaammi naalakkersuisunit erseqqissarneqarpoq aningaasaleeriinnginneq paasineqassanngitsoq aningaasartuutinik killiliiniarnertut.
- Kontomit pingaarnermit aningaasartuutissat annertussusaat maannakkut naatsorsorneqarsinnaanngikkallarput, nassuiarneqarpoq.
50 milliuunit aallarniutaapput
Peqqissutsimut Pitsaaliuinermullu Aqutsisoqarfimmit aningaasaqarnermut ataatsimiititaliamut oqariartuutigineqarpoq 50 milliuunit koruuninik aningaasaleeqqinnissaq pisariaqartinneqartoq. Aningaasartuutissalli qanoq annertutigissanersut suli qulakkeerneqarsinnaannginnerat pissutigalugu Naalakkersuisut aalajangerput aningaasartassat maannamut killilerneqassanngitsut.
Tamanna tunngavigalugu Aningaasaqarnermut ataatsimiititaliaq Naalakkersuisunut arlalinnik apeqquteqarpoq.
Pisariaqartinneqartut annertussusaat qulakkeerneqariarpat ataatsimiititaliamit naatsorsuutigineqarpoq aningaasaliissutissat annertussusilerneqarsimasut qinnutigineqassasut. Ilanngullugu ataatsimiititaliamit piumasarineqarpoq Peqqissutsimut Pitsaaliuinermullu Aqutsisoqarfiup aningaasat 50 milliuunit koruunit piumasai sipporlugit aningaasanik atuisoqarpat, ataatsimiititaliaq naalakkersuisunit ilisimatinneqassasoq.