Peqqinnissaqarfimmi sulisussaaleqinera pissutigalugu suliassat ikilisinneqangaatsiartut
Peqqinnissaqarfimmi sulisussarsiornermik ajornartorsiuteqartoqarmat, aasaanerani nunami tamarmi annikinnerusunik suliaqartoqassaaq. Suliniutigineqartut arlallit ilagaat sineriammi katsorsaallunilu ernisitsisarnerup Nuummut nuunneqarsinnaanerat.
Ukiut kingulliit ingerlaneranni sulisussarsiortarnermik ajornartorsiutaasartoq aasaanerani ajornerusarpoq. Tamatumunnga pissutaapput coronap nunarsuarmi tuniluussimanera aamma nunani avannarlerni peqqinnissaqarfimmi suliusssanut atatillugit unammillertoqalersimanera, peqqinnissaqarfimmit nassuiaatigineqarpoq.
- Aasap qaammataani Peqqinnissaqarfimmi atorfiit inuttalersorniarneqarnerat ajornakusoortanera takornartaanngilaq, aasarmannali sulisussarsiorneq nalinginnaasumiit ilungersunartorsiornarneruvoq, Peqqissutsimut Naalakkersuisoqarfimmit nanoq.gl-imi allapput.
Peqqinnissaqarfimmi sulisussarsiornerup pitsanngorsarnissaa anguniarlugu sulisussarsiornermi suliniutit annertusarneqarput kiisalu taartaasussarsiortarfinniit peqqinnissakkut sulisussarsiortoqarpoq. Naak sulisussarsiornerneq annertusarneqareeraluartoq aasap ingerlanerani Peqqinnissaqarfiup ingerlataasa qaffasissussaat attatiinnarniarlugu naammattunik sulilersitsisoqarsinnaasimanngilaq. Peqqissutsimut Naalakkersuisoqarfimmit ilisimatitsissutigineqarpoq.
Katsorsagassat kinguartinneqarlutillu siniffitsigut inissat matuneqassasut
Taamaammat napparsimmavinni peqqissaavinnilu piffissami aggersumi suliassat ilaat ikilisinneqassapput. Tassani ilaatigut pineqarput: DIN-imi siniffitsigut inissanik matusinerit, napparsimasunik nuussisarnerit, misissugassanik katsorsaanissanillu kinguartitsinerit, ikinnerusunik pilattaanissat, ernisussanik Nuummut nuussisarnissaq, avataani annikinnerusumik suliaqartitsisarneq.
Peqqissutsimut Naalakkersuisoqarfimmit Peqqinnissaqarfimmillu sulisoqarnikkut inissisimanerup pitsanngorsaaffiginiarneqarnera tamaviaarluni sulissutigineqarpoq, tassani innuttaasut sapinngisamik ikinnerpaat taamatut inissisimasoqarneranit sunnerneqarsinnaanerat qulakkeerniarlugu. Suliaq pillugu ingerlaavartumik ilisimatitsissuteqartoqartassaaq.
Sumiiffinnut arlalinnut sunniuteqassasoq
Nuummi Donning Ingridip Napparsimmavissua:
- Siniffitsigut inissat matoqqasut
- Ikinnerusunik pilattaaneq aamma sivisunerusumik utaqqineq
Nunap immikkoortuini Peqqinnissaqarfimmut attaviit allanngortinneri:
- Piffissat ilaanni innuttaasut Peqqinnissaqarfimmut ileqquusunit allaanerusunit innersuunneqartassapput
- Nunap immikkoortuisa napparsimaviannut, Nuummut aamma Danmarkimut napparsimasunik nuussinerit amerlanerit
- Erninerit Nuummut nuutsinneqarsinnaapput
- Avataani annikinnerusumik suliaqartitsisarneq
Suliassat assigiinngitsut najukkanut nalunaarutigineqartassapput. Suna pineqarnersoq pillugu paasisaqarnerusinnaavutit, UANI