Peqqinnissaqarfimmi qullersat: Angajoqqaat paaqqutarinninnermi pitsaanerpaapput

Passuttariaqartunik ajoqusertoqarsimatillugu imaluunniit aqqunartoqarsimatillugu, soorlu uutiterujussuartoqarsimatillugu, angajoqqaat passussinermut annertunerusumik paasisimasaqarnerulersinnaasarput aammalu peqqinnissaqarfimmi sulisunut ilinniartitsisuulersinnaasarlutik, peqqinnissaqarfimmi qullersat ilisimatitsipput.

- Danmarkimi uninnganermi, Kalaallit Nunaannittaaq, qanigisaasut napparsimasorlu ajoqusernerup passunnissaanut ikiuunnissamullu ilinniartinneqarsinnaasarput. Tamannali akisussaassuseqartumik nalilerneqassaaq.

Peqqinnissaqarfimmi qullersat Sermitsiaq.AG-mut allakkatigut ilisimatitsivoq. Anaanaq Sermitsiaq.AG-mut oqaluttuarsimavoq panimi uutiterujussuarsimaneri nammineerlugit passuttariaqartarlugit, naak panini Dronning Ingridip Napparsimmavissuani uninngagaluartoq. Taassuma eqqumiigaa peqqinnissaqarfimmi sulisut allaat nammineerluni ilinniartittariaqaramigit.

Napparsimasut timikkut annertuumik uutiterujussuarsimasut Danmarkimi Rigshospitalimut aallartinneqartarput, Dronning Ingridip Napparsimmavissuani uutitersimasunut immikkoortortaqarfeqanngimmat, uutitersimasunullu passussisinnaasumik immikkut ilinniarsimasumik nakorsaqarani.

Angajoqqaat immikkut ilisimasaqalersarput

Meeqqat napparsimmavimmi uninngasut angajoqqaavi qanigisatut immikkut illuinnartutut isigineqartarput. Meeqqat uninngasut passunneqarnissaannut angajoqqaat peqataatinneqaraangata ilinniartinneqaraangatalu, napparsimmavimmut allamut nuunnermi angajoqqaat immikkut ilisimasaqartutut isigineqarsinnaasartut, nassuiarneqarpoq.

- Taamaappoq angajoqqaat paaqqutarinninnissamut passusseqataanissamullu peqataarusussuseqartarmata, angajoqqaallu peqataanerini meeqqat eqqissisimanerusinnaasarmata.

- Passussinermi suliassanut assigiinngitsunut napparsimasoq qanigisaasorluunniit immikkut ilisimasaqartutut inissisimalersinnaasarpoq, soorlu sulisut taarserneratigut imaluunniit napparsimmavimmut allamut nuunnermi. Taamatullu aamma peqqinnissaqarfimmi sulisunut passusseriaatsimik napparsimasumut tulluarsakkamik ilinniartitsisunngorsinnaasarlutik.

Sulisut peqataasarput

Qanigisaasoq passussisussanngoraangat imaanngilaq kisimiilluni passussissasoq. Peqqinnissaqarfimmi sulisoq pinngitsoorani ikiortaassaaq pisariaqartunilu paarlaasinnaassalluni.

Peqqinnissaqarfimmi sulisut inimeeqataasarnerat pillugu Klara Møller Sermitsiaq.AG-mit apersorneqarnermini oqaluttuarpoq.

Powered by Labrador CMS