Peqqinnissaqarfimmi aqutsisut sulisut pitsaanerusumik oqaloqatigineqartarnissaat neriorsuutigaat
Peqqissaasut kattuffiata peqqinnissaqarfimmi aqutsisut coronamik isumaginninnerat sakkortuumik isornartorsiorsimavaat. Peqqinnissaqarfimmi aqutsisut isornartorsiuinermut akissuteqarsimapput, pitsaanerusumillu oqaloqateqartarnissaq isumaginnittarnissarlu pillugu aqutsisut sulisullu sinniisaat ataatsimeeqatigiissimallugit.
Peqqinnissaqarfimmi aqutsisut peqqissaasut kattuffiata coronamik isumaginninnermik isornartorsiuisimanerat pillugu ataatsimeeqatigiissimapput.
Peqqissaasut peqqinnissaqarfimmi aqutsisunut Naalakkersuisunullu isornartorsiuisimapput, isumaqaramik peqqinnissaqarfiup isumaginninnerata ajorluinnarneranut corona utoqqatsissutitut atorsimagaat.
Peqqinnissaqarfimmi aqutsisut maanna akissuteqarlutik nalunaarutigaat, sulinermit pissutsit, nalunaarutit, politikkikkut kissaatigineqartut allanngortinneqartuarneranni sulisut suliniarsarinerat innuttaasullu piumasaqariartuinnarnerat eqqarsaatigalugit aqutsisut sulisullu sinniisaat ataatsimeeqatigisimallugit.
- Peqqinnissaqarfimmi aqutsisut miserratiginngilaat, sulisut annertuumik tatineqarsimasut sulilu tatineqaqqasut – minnerunngitsumik maannakkut Covid-19-eqarlutik unitsinneqartartut amerliartorneranni. Coronamik isumaginninneq pillugu sivisuumik oqaloqatigiittarsimavugut, maannakkut sulinermi pissutsit pitsaanerpaamik aaqqiissutissarsiorniarlugit. Sulilu pingaaruteqarpoq, sulisunik aqutsisunillu oqaloqateqartarnissaq, tassanilu sulisut sinniisaasa tunniussaqartarnerat suleqatigineqartarnerallu pingaaruteqarpoq.
Peqqinnissaqarfimmi aqutsisut, Peqqissaasut Kattuffiata (PK) peqqinnissaqarfimmi aqutsisut Naalakkersuisullu coronamik isumaginninnerannik isornartorsiuinerat pillugu Peqqinnissaqarfimmi aqutsisunik Sermitsiaq.AG ulluni arlaqartuni apersuerusulluni saaffiginnittareersoq tusagassiorfinnut nalunaaruteqarlutik taamatut ilisimatitsipput.
Ataqatigiissaariniarluni immikkut ataatsimeeqatigiittarneq aallartinneqarsimasoq
Peqqinnissaqarfimmi aqutsisut oqaatigaa, sulisut immikkut ataatsimeeqatigiinnermi peqataatinneqarsimasut, tassani immikkoortortaqarfinni tamani sulisut suliassat pillugit pitsaanerusumik takunnissinnaalernissaat anguniarlugu.
- Ataatsimeeqatigiinnermi sulisut napparsimasullu agguataartuartarnerat misissorparput. Suleqatit immikkoortortaqarfiit akimorlugit ikiuunnissamut namminneerlutik aalajangersimasut isumaqatigiissutaareersut iluini naammassisaqarusuttut pingaaruteqarluinnartuupput, peqqinnissaqarfimmi aqutsisut allapput.
Peqqissaasut Kattuffianni siulittaasup Petra Luna Fugløp isornartorsiuinermi erseqqissaassutigaa, oqartussat aalajangiissuteqartillugit sulisut tusarniaaffigineqartarnissartik amigaatigisaraat.
- Sulisut naammagisimaarinninnerat unitsikkallarneqarpoq, tamatigullu suliassani pissutsinilu nutaani ingerlaartariaqartarpugut. Kialluunniit coronap qaammatinit sisamanit sivisunerunissaa naatsorsuutigisimanngilaa. Maannalu ukiut marlunngulereerput, taanna oqarpoq, nangillunilu:
- Tunillaassuuttoqarnerulernerani nalinginnaasumik ingerlaneq ungasittorujussuussavarput. Peqqissaasut suli tatisimaneqarnerulissappata, isumi ajornartoornermi inissisimalersinnaasumiippugut. Oqaloqatiginninnissatsinnut qanoq sivisutigisumik utaqqissagatta, Petra Luna Fuglø aperivoq.
Peqqinnissaqarfimmi aqutsisut erseqqissaassutigaa, ullut tamaasa suleqatiginnikkusuttoqarluartartoq aamma sulisut suliarisimasaminnik tulluussimaaruteqartariaqartut.