Skip to main content

Peqqinnissaqarfik: Taartaasartunut aningaasartuutit 2019-imi ikinnerupput

Sulisussarsiortarneq pillugu Danmarkimi HR-imi immikkoortortaqarfeqalernerup kinguneranik, sulisussarsiornerup tungaatigut ilorraap tungaanut allanngortoqarsimavoq, sulisussarsiortartoqatigiit pilersinneqarneratigut ingerlaavartumik suliuarneq qulakkeerneqarluni. Taartaasartunut aningaasartuutit ukiup ataatsip ingerlanerani 14,6 milliuunit koruuninik ikilisinneqarput.

Taartaasartunut aningaasartuutit 2019-imi 36.692.000 koruuningajaapput. Peqqinnissaqarfimmi taartaasartunut aningaasartuutit 2018-imut sanilliullugit 14,6 milliuunit koruuninik ikinnerupput, 2018-imi 51.324.000 koruunit atorneqarsimagamik.

- Sulisussarsiornerup Danmarkimiit ingerlanneqalernerata sunniutaa tassaavoq peqqinnissaqarfiup pingaarnermik sulisussarsiorfiusumi najuunnera aamma suleqatigisanit ajornanngitsumik attaveqarfigineqarsinnaanera.

Peqqissutsimut naalakkersuisup, Martha Abelsenip (S) Sofia Geislerip paragraf 37 atorlugu peqqinnissaqarfiup Danmarkimi sulisussarsiortoqalersimaneranut apeqqutaanut taama akissuteqarpoq.

Martha Abelsen akissutimini erseqqissaavoq Danmarkimi HR-imik immikkoortortaqalerneq peqqinnissaqarfiup iluani annertunerusumik aningaasartuutitaqanngitsoq. Suliniutilli pingaarnerup Nuummiit
Københavnimut nuunneqarnera tassani pineqarluni.

- Sulisussarsiornermi pitsaanerusumik isumaqatigiissuteqartarnissaq, angalanermut aningaasartuutikinnerunissaq sulisussarsiornermilu ilaalu ilanngullugit nammineq nittartakkatsinnik atuinerunissaq 2018-imiit 2019-imut ukkatarineqartorujussuuvoq.

Sulisussarsiornermut aningaasartuutit ima isikkoqarput:

  • 2019: 2.201.000 koruunit (pr. 19/12 2019)
  • 2018: 3.170.000 koruunit
  • 2017: 2.742.000 koruunit
  • 2016: 2.675.000 koruunit
  • 2015: 3.540.000 koruunit

Sulisoqarnermi ajornartorsiutit

Martha Abelsen akissutimini allappoq pingaartumik nakorsaqarnikkut, peqqissaasoqarnikkut kigutilerisoqarnikkullu allanilu sulisussanik amigaateqartoqartoq.

- Peqqinnissaqarfiup sulisuisa amerlanersaat Danmarkimeersuupput, Danmarkimi HR-imik immikkoortoqarfeqalerneq pillugu nassuiaatigineqarpoq.

Sulisussarsiortartoqatigiit 2019-imi nittarsaassinerni qulini peqataapput, asoornerup nalaani arlaleriarlutik ataatsimiititsisarlutik, katillugit 279-inik peqataaffigineqartunik.

- ​​​​​​​Sulisussarsiortartoqatigiit qallunaat napparsimmaviinik arlalinnik
suleqateqarnissamik isumaqatigiissuteqarnermut (sulisut nikerartinneqarnissaannik isumaqatigiissutit) atatillugu piareersaataasumik suliarujussuaq suleqataaffigisimavaat.​​​​​​​ Tamatumunnga ilutigitillugu isumaqatigiissutit tamakku qanimut malitseqartinneqartuartariaqarmata Danmarkimiinnissaq pingaaruteqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER