Peqqinnissaqarfik: Suliassat pinartuunngitsut kinguartinneqarput

Nunatsinni peqqinnissaqarfik ulluni makkunani nukissatigut, sulisoqarniarnikkut inissatigullu immikkut ittumik ilungersortitaavoq. Tamassumunnga pingaarnertut peqqutaavoq coronavirusip inuiaqatigiinni tuniluunnera, tamassumalu kinguneri.

Taamaammat pilattaanissat, nakorsiartitsinissat suliassallu allat pinartuunngitsut kinguartinneqarsinnaasutullu nalilerneqartut, 1. februar 2022-muugallartoq kinguartinneqarput.

Peqqinnissaq pillugu aqutsisoqarfik tusagassiorfinnut nalunaaruteqarluni taama allappoq.

- Coronap tuniluunnerata iliuuseqarfiginera, misissuinernut taakkulu misissoqqissaarneqarnerannut, akiuussutissiinernut maannalu aamma uninngasunut nukissanik atuiffiuvoq, tunngavilersuutigineqarpoq.

Nunatsinni maanna 167-it coronamik tunillatsissimasutut allaqqapput. Pingasut Upernaviup peqqissaaviani uninngapput. Marlullu Nuummi uninngatinneqarlutik.

Pilattaanissat ilaat kinguartinneqarput

Peqqinnissaqarfiup ingerlaannarnissaa qulakkeerniarlugu suliassat ilaat tunulliunneqartariaqalersimasut, nassuiaatigineqarpoq.

- Soorunami innuttaasut tamatuminnga eqqugaasussat sapinngisamik ikinnerpaanissaat anguniarlugu Peqqinnissaqarfik nalimmassaajuassaaq.

Peqqinnissaqarfimmi suliassanik taama kinguartiterisoqaqqaarpoq martsimi 2020-mi. Taamani nunatsinni coronavirusimik tunillatsissimasut siulliit paasineqarput.

Peqqinnissaqarfimmi aqutsisut erseqqissaatigaat suliassat nakorsiartitsinerillu pinartut, soorlu kræfteqartunut sullissinerit, kinguartinneqaratik ingerlaannassasut.

Nakorsiartut kinguartitsinermit eqqorneqartut peqqinnissaqarfimmit ilisimatinneqarumaarput.

- Peqqinnissaqarfiup oqarasuaatai pisariaqanngitsumik artukkerumanagit, nakorsartittussat, arlaannik isumaqatigiissuteqartut, kinguartitaasimasinnaanertik paasiniarlugu oqarasuaatikkut attaveqannginnissaannik qinnuigaagut. Peqqinnissaqarfik kinguartitaasunut toqqaannartumik attaveqassaaq, peqqinnissaqarfimmi aqutsisut nassuiaapput.