Peqqinnissaqarfik tunillatsissimasunik sumiissusersiniaasoq: Syfilisimik nappaateqartut 73 procentii nassaarineqarput
Syfilisi unikaallatsinneqassappat peqqinnissaqarfiup napparsimasut eqeersimaarluni sumiissusersiniartariaqarpai. Ikittuinnaat nappaammut ersiuteqarlutik saaffiginnittarnerat Tasiilami nappaalasoqarnerani misilittakkanit takutinneqarpoq.
Tasiilaq nunaqarfiilu syfilisip tuniluutilersimaneranit 2014-imi aasakkut eqqugaapput. Nappaat tamatuma kingorna sukkakannersumik siaruakkiartulerpoq.
– Tamanna mianernartorujussuuvoq, Lydia Helms, Nakorsat peqatigiiffiata atuagassiaani Nakorsanumi normumi nutaami, nappaalasoqalernera pillugu sukumiisumik allaaserisaqarfiusumi, oqarpoq.
Syfilis nappaatitut Kalaallit Nunaanni nakorsat ulluinnaanni ukiorpanni puigugaangajaqqasimavoq. Nuna tamakkerlugu piffissami 2000-imit 2011-mut syfilisimik tunillatsissimasut marluinnaat nalunaarutigineqarsimapput.
Nappaalli uteqqimmat tamanna sakkortoorujussuusimavoq. Kitaani illoqarfinnit kangimut siaruaassimavoq. Tasiilami anigoqqinnissaa ajornakusoorsimavoq.
– 2014-imit 2019-imi decembarip 1-ata tungaanut Tasiilami syfilisimik nappaateqartut katillugit 88-it paasineqarsimapput. Arnat 59 procentit angutillu 41 procentit, Lydia Helms paasissutissiivoq.
Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq: