Peqqinnissaqarfik pillugu naammagittaalliuutit amerlanerulertut

Nunatta nakorsaaneqarfiani peqqinnissaq pillugu siunnersorti, peqqinnissaqarfimmi sulisut pillugit naammagittaalliuutigineqartut amerligaluttuinnartut ukiut tamaasa suliarisarpai.

Peqqinnissaqarfik pillugu naammagittaalliuutit nunatta nakorsaaneqarfianit suliarineqartarput. Amerlaneruleriartortullu naammagittaalliuuteqartarnerat nakorsaaneqarfimmi ulapinnarsivoq.

Peqqinnissaqarfimmi sulisut sullissinerat nakorsaanerallu pillugu naammagittaalliuutit 157-it ukioq manna tunniunneqareersimapput. Ukiup siuliani taamaalineranut sanilliullugu naammagittaalliuutit tiguneqarsimasut amerlanerujussuupput.

Sundhedsfaglig konsulent Louise L. Faber

Ukiut kingulliit tallimat naatsorsuutit takutippaat ukioq manna naammagittaalliuutit tiguneqareersimasut ukiut siuliinut sanilliullugu aatsaat taama amerlatigisut.

- Sulisoqarnikkut amerlanerusariaqavippugut, naammagittaalliuutimmi apuussorneqartut amerliartuinnartillugit angummanniapiloortorujussuanngorpugut. Naammagittaalliuutit tiguneqarneraniit ingerlaavartumik suliarineqartarput, angummanniarnerlu maanna ilungersunarluinnarpoq, nunatta nakorsaaneqarfiani peqqinnissaq pillugu siunnersorti Louise L. Faber Sermitsiaq.AG-mut oqarpoq.

Suliassat angummaffiginiarlugit ikiorneqartariaqartut

Nunatta nakorsaaneqarfiani maanna suleqataavoq Danmarkimi peqqinnissaqarfimmi disciplinærnævnimi naammagittaalliuutinik suliaqartarfimmi inatsisileritooq. Inatsisileritooq nunatsinni qaammatini pingasuni atorfeqartinneqarallarpoq, nunatsinnilu peqqinnissaqarfimmut tunngasuni naammagittaalliuutinik suliaqaqataatinneqarluni. Sulisut pingasut nalinginnaasumik naammagittaalliutilerisartuupput.

Ima amerlatigisut naammagittaalliuuteqarsimapput:

  • Okt. 2022 ilanngullugu: Naammgittaalliuutit 157-it
  • 2021: Naammagittaalliuutit 121-t
  • 2020: Naammagittaalliuutit 119-it
  • 2019: Naammagittaalliuutit 121-t
  • 2018: Naammagittaalliuutit 94-it
  • 2017: Naammagittaalliuutit 86-it

Danmarkimi aalajangiiffigineqartarput

Naammagittaalliuutit aalajangersimasunik sammisanik imaqakkajupput. Soorlu eqqunngitsumik suliaritinneq nakorsaaserneqarnerluunniit. Aammali nakorsiarnerni nappaatip suussusersiniarneqarnerani eqqunngitsumik misissorneqarsorineq naammagittaalliuutigineqartarpoq. Peqqinnissaqarfiulli nakorsiartullu akornanni attaveqatigiinnerup pitsaannginnera aamma naammagittaalliuutigineqakkajuppoq.

- Sulisussaaleqineq tassani peqqutaaqataasimasinnaavoq, peqqinnissaqarfimmi sulisussaaleqingaatsiarpoq, nakorsiartullu peqqinnissaqarfimmit itigartinneqartariaqartarnertik misigisimassavaat, aammali oqaatsit assigiinngitsut atorlugit nakorsiartariaqartarnerit paatsooqatigiinnermik kinguneqartarsinnaapput, Louise L. Faber oqarpoq.

Nunatta nakorsaaneqarfiata naammagittaalliuutit pillugit oqaaseqartitsiniaaneq nalilersuinerlu ingerlattarpai. Suliat naammassisut Danmarkimi peqqinnissaqarfik pillugu naammagittaalliortarfimmut ingerlateqqinneqartarput tassanilu inaarutaasumik aalajangiiffigineqartarlutik. Nunatta peqqinnissaqarfik akisussaaffigilereeraluaraa taamaattoq peqqinnissaqarfiup iluani sulisunik naammattunik peqannginneq pissutigalugu aalajangiiffiginninnerit Danmarkimi pisariaqartartut nassuiaatigineqarpoq.

- Peqqinnissaqarfiup iluani immikkut ilisimasallit naammattut piginngilagut. Assersuutigalugu timip aalaasaa pillugu immikkut ilisimasalik nakorsaq pillugu naammagittaalliuut, nakorsamut ilusiortumut nalilersortissinnaanngilarput. Taamaammat politikkikkut aalajangerneqarsimavoq naammagittaalliuutit nunatsinni nalilersorneqareerpata, Danmarkimi aalajangiiffigisassanngorlugit suliassanngortinneqassasut, Louise L. Faber nassuiaavoq.

Powered by Labrador CMS