Peqqinnissaqarfik pillugu isumasioqatigiinneq matoqqasumik ingerlanneqartoq

Tusagassiortut peqqinnissaqarfik pillugu isumasioqatigiinnermut, Kalaallit Nunaanni peqqinnissaqarfiup siunissami tunngavissaanik pilersitseqataasussamut peqataaqquneqarsimanngillat. Innuttaasut taamaalillutik isumasioqatigiinnermit imaqarniliamik, aaqqissuisup – Peqqissutsimut Naalakkersuisup Martha Abelsenip – oqaluttuarerusutaanik, namminerlu oqaatsini atorlugit oqaluttuarerusutaanik paasitinneqanngillat.

Sermitsiaq.AG ataasinngormat isumasioqatigiinnissaq sioqqullugu peqataasoqarsinnaanersoqapeqquteqarpoq, Peqqissutsimulli Naalakkersuisoqarfik itigartitsivoq.

Politikkerit paasinninngitsut

Isumasioqatigiinnermi peqataasut marluk – IA-mi siulittaasoq Múte B. Egede aamma Suleqatigiissitsisuneersoq Tillie Martinussen – tusagassiortut taamalu innuttaasut sooq peqataatinneqannginnerat paasisinnaanngilaat, sammisaq innuttaasut inuunerannut peqqissusaannullu attuumassuteqarluinnartuummat.

- Tusagassiortut isumasioqatigiinnermut peqataaqquneqannginnerat tusarlugu assut ajuusaarnarpoq, Tillie Martinussen Inatsisartuni Peqqissutsimut Ataatsimiititaliami ilaasortaq oqarpoq.

- Sammisap pineqartup innuttaasunut apuunneqarnissaa pingaaruteqarpoq, tusagassiortut apuussinngippata kikkut allat tamanna qulakkeersinnaagamikku, Tillie Martinussen inatsisiliornermut tusagassiortut peqataatinneqarnerisigut ammanerusumik ingerlatsisoqarnissaanik ujartuisoq aperivoq.

IA-mi siulittaasoq Múte B. Egede isumasioqatigiittoqarmat ullup qeqqata siornatigut peqataavoq.

- Tusagassiortunik mattussineq innuttaasunik peqqinnissaqarfiup qanoq inissisimanernik ilisimasaqartariaqartunik aamma mattussineruvoq. Tamannami Peqqinnissaqarfiup siunissami qanoq aaqqissuussaanissaanut innuttaasut oqalliseqataanissaannut periarfissatuaavoq, IA-mi politikkeri erseqqissaavoq.

Toqqissisimajunnaartitsissasoq

Múte B. Egede isumaqarpoq, innuttaasut peqqinnissaqarfiup siunissaa pillugu ingerlatsinermut malinnaatinneqanngippata toqqissisimajunnaartitsisoqassasoq.

- Siorna Attaveqaatinut Naalakkersuisup Simon Simonsenip politikkerit, sulisut tusagassiortullu timmisartoqarfissat nutaat pillugit isumasioqatigiinnissamut qaaqquai. Taamanikkut ammasumik ingerlatsinissaq qulakkeerneqarpoq. Naalakkersuisut peqqinnissaqarfipput pillugu taamak pingaaruteqartigisumik sammisaqarnermi tamanna aamma qulakkeertariaqarpaat, Múte B. Egede erseqqissaavoq.

Nassuiaat

Peqqissutsimut Naalakkersuisoq Martha Abelsen, tusagassiortut sooq iseqqusaasimannginnerat pillugu imatut nassuiaateqarpoq:

- Uannut pingaaruteqarsimavoq, politikkerit pineqartumut attuumassuteqartut kiisalu peqqinnissaqarfimmi sulisut kisimik isumasioqatigiinnermut peqataatinneqarnissaat. Taamaalilluni qulakkeerneqassammat politikkerit partiimi anguniakkaminnik taamaallaat oqaluuserisaqannginnissaat, taamalu aamma oqallinnerup arlaannaannulluunniit attuumassuteqanngitsumik ingerlanneqarnissaa. Peqataasut allat aamma tusagassiortut eqqarsaatigivallaassanngilaat, taamalu allamut sangusaratik – oqaasissatik toqqaannartumik anissinnaallugit.

Matoqqasumik ingerlatsisarneq ingerlatiinnarneqassasoq

Kalaallit Nunaanni peqqinnisssaqarfiup aaqqissuunniarneqarnerani periutsini allanngortinnagu ammasumik ingerlatsisalernissani eqqarsaatigisimanngilaa.

- Suliniaqatigiiffiit peqqinnissaqarfik pillugu isumasioqaqtigiinnerani pisussami periuseq taama ittoq atussallugu eqqarsaatigisimavara, Martha Abelsen Sermitsiaq.AG-mut erseqqissaavoq.