Skip to main content

Peqqinnissaqarfik pillugu Danmarkimit ikiorneqarnissaq partiit tallimaasunit sisamat kissaatigaat

Partiit tallimaasunit sisamat isumaqarput nunatsinni peqqinnissaqarfiup pitsanngorsarnissaa pillugu Danmark suleqataasariaqartoq. Qineqqusaartut sisamanngornermi oqallinneranni tamanna paasinarsivoq.

Atassut, Inuit Ataqatigiit, Naleraq, Siumut aamma Demokraatit naalagaaffeqatigiinnerup iluani politikkertik pillugu qinersisartunut ilisimatitsissallutik GUX Nuummi sisamanngornermi unnukkut issaasimapput.

Oqallinnermi Danmarkimut suleqateqarneq, inatsisinik atuutsitsineq illersornissamullu politikki sammisarineqaraluartut, taamaattoq sammisaq ataaseq politikerit sammerusulluinnarpaat. Tassalu nunatta 1992-imi akisussaaffigilersimasaa - peqqinnissaqarfik.

Demokraatit qinigassanngortitaat Anna Wangenheim isumaqarpoq peqqinnissaqarfik pillugu nunarput Danmarkimilu suleqatigiittariaqartut.

Peqqinnissaqarfimmi nalingiimmik neqerooruteqarneq

- Danmark arlaatigut suleqatigisinnaasariaqarparput, peqqinnissaqarfitta pitsaanerulernissaa anguniarlugu. Suleqateqarnerulerneq naalagaaffeqatigiinnermut Danmarkimulluunniit pituttuinerunertut taasariaqanngilaq. Nunatut namminiilivissimasutut nunanut allanut aamma suleqateqarsinnaasariaqarpugut, Anna Wangenheim Nuummi oqallittoqarnerani sisamanngornermi unnukkut oqarpoq.

Atassummit Aviaq Kleist isumaqarpoq namminiilivinnissaq pillugu oqallinneq siunissami aatsaat pisariaqartoq. Atassut partiini kisiartaalluni ersarissumik isummerpoq peqqinnissaqarfiup Danmarkimut utertinneqartariaqarnera pisariaqartoq:

- Sumiluunniit najugaqarneq apeqqutaatinnagu, innuttaasut pisariaqartitsinermi nakorsamit nalingiimmik nakorsarneqarsinnaasariaqarput. Inuiaqatigiit peqqissut siunissaq ungasinnerusoq eqqarsaatigalugu namminiilivissinnaajumaarput, Aviaq Kleist (A) oqarpoq.

Danmark akiliissaaq

Nunatta akisussaaffigileriigaanik pitsanngorsaaniarlutik folketingimut qinigassanngortittut Danmarkimut suleqatiginnikkumanissamik kissaateqarlutik siullermiilinngillat oqariartuuteqarlutik.

Folketingimut qinersinermi kingullermi meeqqat inuusuttullu kinguaassiutitigut atornerlunneqartarnerisa akiorneqarnissaat annertuumik aamma oqallisaavoq. Folketingimi ilaasortat, Naalakkersuisut Inatsisartullu kingorna annertuumik angusaqarput, meeqqanut inuusuttunullu kinguaassiuutitigut atornerluisoqartarneranut akiuinissamut milliuunilikkaanik koruuninik Danmark aallerfigigamikku suleqatigilerlugulu.

Partiit arlallit maanna kissaatigaat Danmark nunatsinni peqqinnissaqarfimmut aamma aningaasaliinerussasoq.

- Peqqinnissaqarfipput pillugu Danmarkip suleqatiginiarnissaa ilungersuutigissavarput. Nakorsiammi Danmarkimut aallarunneqartartunut, soorlu aamma danskit nunatsinni najugaqartut nakorsiartillugit Danmarkimut aallarunneqartartunut, aningaasartuutit sipaarsinnaavagut. Taakkulu sipaakkagut nunatsinni peqqinnissaqarfitta pitsaanerulernissaanut aningaasaliissutigisinnaavagut, Juno Berthelsen (N) oqarpoq.

Naammagittaalliuutit amerliartorput

Inuit Ataqatigiinnit qinigassanngortittut oqaatigereerpaat nunatsinni Danmarkimut nakorsiartut napparsimmavimmut sorlermut nakorsiarnissartik aalajangersinnaasariaqaraat, Aalborgimi peqqissartunut angerlarsimaffeqalertariaqartoq, peqqinnissaqarfik pillugu Danmark suleqatiginerusariaqartoq kiisalu nunarput danskit kræftimut akiuiniarneranut suliniutinut ilanngutsinneqartariaqartoq.

- Ullumikkut unammilligassarisagut oqaloqatigiissutigisinnaasariaqarpagut. Naammagittaalliuutit amerlanerulersimapput. Kræftimik napparsimalersimasut piaarnerusumik ikiorserneqartariaqarnissaat anguniarutsigu danskit kræftertunut suliniutaannut ilanngunniartariaqarpugut, naalagaaffeqatigiinnerup iluani kræfteqartut assigiimmik sullinneqarnissaat anguniarlugu, Aaja Chemnitz (IA) qineqqusaartut oqallinneranni oqarpoq.

LÆS OGSÅ: Peqqinnissaqarfik pillugu naammagittaalliuutit amerlanerulertut

Siumut kisiartaalluni oqallittoqarnerani peqqinnissaqarfik oqaatsimik ataatsimilluunniit taanngilaa. Aki-Matilda Høegh-Dam (S) Sermitsiaq.AG-mut nassuiaavoq Siumup politikkerinngikkaa akisussaaffiit angerlaanneqareersimasut utertinniarnissaat, taamaattumillu peqqinnissaqarfik pillugu danskit aningaasaliitinniarnissaat inissaminiissorinagu.

- Tamanna politikkerinngilarput. Peqqinnissaqarfik taamani angerlaannialeratsigu danskit sullissinerat aamma naammaginngilagut, uagullu pitsaanerusumik iliorsinnaalluta taamani isumaqarpugut. Akisussaaffik nunatsinniippoq, taamaattumillu inatsisartunit naalakkersuisuniillu pitsanngorsaaviginiarneqartussaalluni, Aki-Matilda Høegh-Dam Sermitsiaq.AG-mut oqarpoq.

Suleqatigiissitsisut qinigassanngortitaat, Tillie Martinussen oqallinnermi peqataanngilaq. Partiilli Danmarkimut suleqateqarnerulernissaq Naalagaaffeqatigiinniiginnarnissarlu politikkerivaat.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER