peqqinnissaqarfik

Peqqinnissaqarfik nutaanik marlunnik scannerutitaartoq

Scannerutitaat nutaat marluk Nuummi sisamanngornermi pisortatigoortumik atoqqaarfissiortinneqarput

Scannerutit nutaat pitsaanerusumik nakorsartinnissamut qulakkeeripput siunissamullu eqqanaaralutik nakorsartittartunik 2500-it missaanniittunik misissuisarneq maanna pitsanngoriarpoq siunissamullu eqqanaarisoqarluni. Nutaarsiassaq nuannersoq peqqinnissaqarfimmiit taama tutsiuppoq.

Peqqissutsimut Naalakkersuisoqarfiup paasissutissiaraa, napparsimasut siulliit scannerit nutaat iluaqutigilereeraluarat qaaqqusat 50-it missaanniittut pisortatigoortumik sisamanngornermi novembarip ulluisa aappaanni atortorissaarutinik nutaaliaasunik atoqqaartitsineq peqataaffiginngitsuunngilaat

Assilisat pitsaanerit

- Scannerit taakku marluk inuppassuarnut minnerunngitsumik assilisat pitsaassusaasa qaffasinnerulernerisigut nappaammik suussusersiniaanermik pitsaanerulersitseqataassussaanertik pissutigalugu annertuumik pingaaruteqartussaassapput. Taama nutarterinikkut periutsit nutaaliaasut naapertorlugit nakorsaasinnaanermik neqeroorsinnanermut tunngatillugu peqqinnissaqarfik siunissamut eqqanaarsarpoq, Aqutsisoqarfiup pisortaa Malene Marie Nielsen oqarpoq.

Nakorsartittunut immikkoortortaqarfimmi nakorsaanertut pisortaasoq Folmer Lynggaard oqalugiartunut ilaavoq taassumalu ilaatigut CT scanner atorlugu misissuinerup kræftimik nappaatit suussusersinissaannut, ajutoornerni tassaanngaannaq pisuni kiisalu annertuumik aqqunarnerni pingaaruteqarnera erseqqissarpaa.

Uummatinik misissuinernut pitsanngorsaataassasoq

Scannerit uummatinik misissuinernut pitsannguutaanissaattaaq oqaatigaa. Tamatuma saniatigut marlunnik scannereqarnerup
– scannerip aappaa atorsinnaajunnaarallassagaluarpalluunniit – peqqinnissaqarfimmi tamatigut scanner atorlugu misissuisoqarsinnaanissaa iluaqutitaasoq erseqqissarpaattaaq.

Peqqissutsimut Naalakkersuisoqarfimmi pisortap Tine Parsip qalersaq kipivaa, qaaqqusallu tamarmik iserlutik atortorissaarutinik nutaanik takusaaqquneqarnerisa nalaani qanoq atorneqartarneri periarfissallu pillugit soqutiginnittumik alapernaatsumillu apeqqarissaartoqarpoq.

Powered by Labrador CMS