Peqqinnissaq pillugu oqaaseqartartoq: Amerlanerusut onlinekkut nakorsiarsinnaassapput
Inatsisartuni ilaqutariinnermut peqqissutsimullu ataatsimiititaliami siulittaasoq Agathe Fontain isumaqarpoq onlinekkut nakorsiussisinnaaneq inerisarneqarnerusariaqartoq, innuttaasut peqqinnissaqarfimmit pitsaasumik sullinneqarnerat pitsanngorsarlugu.
Meeqqat arlallit nunatsinni peqqinnissaqarfimmit naammaginanngitsumik sullinneqareersorlu, angajoqqaatik ilagalugit Danmarkimut nammineq akilikkamik nakorsiartut, Inatsisartuni ilaqutariinnermut peqqissutsimullu ataatsimiititaliap ilisimavai.
- Silaalooqaat meeqqat angajoqqaallu Danmarkimut nakorsiartariaqarnermik misigisut, Agathe Fontain (IA), ilaqutariinnermut peqqissutsimullu ataatsimiititaliami siulittaasoq peqqissutsimullu tunngatillugu oqaaseqartartoq oqarpoq.
Meeqqat pingasut ukiukitsut amerluutitik pillugit Danmarkimi maanna nakorsarneqarput. Sermitsiaq.AG-p paasissutissaatai naapertorlugit meeqqat sisamassaat, nunaqqataasunit taperneqareerluni Danmarkimut nakorsiarluni maanna tikissimalerpoq. Meeraq nakorsiartoq amerluuteqarani allamik nappaateqarpoq.
Pipaluk nukittorsarneqartariaqarpoq
Peqqinnissaqarfiup sullissineri pillugit Inatsisartut peqqussutaanni paragraf siullermi allassimavoq anguniarneqassasoq "peqqinnissaqarfiup sullissinerinut assigiimmik periarfîssaqartitsisoqarnissaa sumi najugaqarneq apeqqutaatinnagu”. Agathe Fontainilu isumaqarpoq internetikkut Pipaluk atorlugu nakorsiussisinnaaneq atorneqarnerusariaqartoq.
Taanna oqaluttuarpoq nammineq ilisimasaqarfigalugu Pipaluk siornatigut atorluarneqarsimasoq. Internetilu atorlugu assit nassiullugit immikkut ilisimasalinnut misissuititsisarneq atorneqartartoq, nakorsat immikkut ilisimasallit nakorsiartup qanoq innera paasisaqarfigineruniassammassuk.
- Taama nakorsiarsinnaaneq nukittorserneqartariaqarpoq, peqqinnissaqarfiup iluani immikkut ilisimasallit pigisagut atorluartariaqarpagut, Agathe Fontain oqarpoq.
Immikkut ilisimasalinnik suleqateqarneq
Nunatsinni nakorsat immikkut ilisimasallit Dronning Ingridip Napparsimmavissuani atorfeqarput, immikkulli ilisimasallit nunatta avataaniittut aamma suleqatigineqarput.
Peqqissutsimut ataatsimiititaliami siulittaasup kissaatigaa paasisaqarfiginerussallugu immikkut ilisimasalinnut suleqateqarneq qanoq ingerlanersoq, qanorlu annertusarneqarsinnaanersoq.
- Immikkut ilisimasallit suleqatigineri qanoq ingerlanersoq paasisaqarfigerusuppara malersussallugulu. Najukkani tamani immikkut ilisimasalinnik nakorsaqarsinnaanngilagut, kisiannili immikkut ilisimasallit pigisagut atorluarsinnaasariaqarpagut, oqarpoq.