Peqqinnissaq pillugu ataatsimiititaliarsuaq sulileriaannanngorpoq

Peqqinnissaq pillugu ataatsimiititaliarsuarmi ilaasortassatut toqqakkat Naalakkersuisunit akuerineqarsimapput. Ataatsimiitialiarsuup sulinissaa aggustimi aallartissasoq naatsorsuutigineqarpoq.

De syge får et særskilt sted i Kangerlussuaq, men hvornår kan Mittarfeqarfiit ikke oplyse endnu.

Peqqinnissaq pillugu ataatsimiititaliarsuarmi ilaasortassatut toqqakkat Naalakkersuisunit akuerineqarmata, eqqartuussissuserisoq Ulrik Blidorf ataatsimiititaliarsuarmi siulittaasunngortinneqarpoq.

Peqqinnissaq pillugu ataatsimiititaliarsuaq qulinik ilaasortaqarpoq, siulittaasoqarfimmi attuumassuteqanngitsumik pingasunik ilaasortaqarpoq. Ilaasortat arfineq-marluk soqutigisaqaqatigiinniit innersuunneqarnikkut toqqarneqarput, Namminersorlutik Oqartussat tusagassiorfinnut nalunaaruteqarnermi allapput.

Siulittaasoqarfik ukuninnga ilaasortaqarpoq:

Siulittaasoq: Eqqartuussisuserisoq Ulrik Blidorf

Siulittaasup tullia: Peqqinnissakkut aningaasaqarnermik peqqinnissamullu politikimik professori Keld Møller Pedersen

Siulittaasup tulliata aappaa: Issittoq pillugu ilisimatusarnermi Ph.d., Cand. Tarnip pissusaanik ilisimatusarnermi Ilinniartitaanerlu pillugu ilinniakkami Mag. Peqqissaasoq Tine Aagaard

Tulliuttut Peqqinnissaq pillugu ataatsimiititaliarsuarmi ilaasortassatut toqqarneqarput:

Brita Broberg, Kigutit Nakorsaasa Peqatigiiffianneersoq

Nicolai Hardenberg Larsen, Nakorsat Peqatigiiffianneersoq

Neriuffimmi siulittaasoq, Mette-Sofie Jørgensen

Inge-Lise Kleist, PPK Peqqinnissaq pillugu Kattuffimmeersoq

SIK-mi siulittaasup tullia, Ludvig Larsen

Kommuneqarfik Sermersuumi sulianut pisortaq, kommunit sinnerlugit, Arnannguaq Heilmann Christensen

KANUNUPE-mi siulittaasoq, Jens Kristian Therkelsen

Ataatsimiititaliarsuup suliassai

Ataatsimiititaliarsuup siunertaraa peqqinnissaqarfimmi ataatsimut isigalugu pitsanngorsaatissanik naleqqussaatissanillu inassuteqaasiornissaq, tamatumunnga ilanngunneqarlutik peqqinnissaqarfiup aaqqissuussaanera tamarmiusoq, sulisussarsiortarneq sulisullu sulisoriinnarnissaat.

Ataatsimiititaliarsuup sulilernissaa coronap ajornartorsiortitsinera aallartimmat unitsikkallarneqaraluarpoq. Ataatsimiititaliarsuarmili ilaasortat maanna sulileriaannanngorput, aggustimilu ataatsimiinnissartik siulleq aallartissinnaanngorlugu.

Ataatsmiititaliarsuaq suliniutit arlallit pissusissamisoornersut misissussallugit nalilersussallugillu naatsorsuutigineqarpoq, immikkoortunut tullinnguuttunut suliarinninnissamik aningaasaliissutini sinaakkutigineqartuni aaqqiissutissatut periarfissanik periusissanillu ujartuissallutik.

Ataatsimiititaliarsuaq pillugu paasisaqarnerusinnaavutit, uani.

2021-p ukiuata affaani siullermi ataatsimiititaliarsuup suliai, soqutigisaqaqatigiinnut innuttaasunullu saqqummiunneqassapput, suliap ingerlateqqinneqarnissaanut oqaloqateqarnissaq tunniussaqartarnissarlu siunertaralugit. Tamannalu Peqqinnissaq pillugu ataatsimiititaliarsuup sulinerup qiteqqunnerani nalunaarusiornermi tunngavigisariaqarpaa.

Nalunaarusiaq 2021-p ukiuata affaani kingullermi naammssineqassaaq, naatsorsuutigineqarlunilu 2022-mi Naalakkersuisunut Inatsisartunulu saqqummiunneqassasoq.

Powered by Labrador CMS