Peqqinnissakkut takorluugaq ajalusoortoq
Napparsimasumut ataatsimut Danmarkimut suliaritikkiartorneq agguaqatigiissillugu 103.421 koruuninik akeqartarpoq. Soormi taava napparsimasunik aallartitsisarnerpassuit taamaatiinnaraanni nunatsinnilu isumagisarilerlugit? Immikkut ilisimasallit suliamik itisiliillutik misissuisimapput.
196 millioner koruunit.
Kalaallit napparsimasut Danmarkimi suliaritittarnerat ukiumut taama akeqarpq. Aningaasat nakorsanit ikiorneqarnermut nunatta karsiata akiliutigisartagaanut taamaallaat tunngassuteqartut. Tassa angalanermut najugaqarnermullu aningaasartuutit ilanngunnagit.
Aviisi AG taama allappoq.
2017-imi 2018-imilu katsorsartikkiartortut katillugit 1.898-iusimapput.
Inatsisartunut ilaasortanit 200 millioner koruuningajaat taakkua ukiorpanngortuni sukannersumik isiginiarneqarsimapput. Sipaarniutaasinnaasut politikkikkut oqallinnermut aalajangersimasumik ilaatinneqartarput.
Naalakkersuisoqatigiinnissamik isumaqatigiissummi, 2018-imi ilaatigut Siumup aamma Nunatta Qitornaasa akornanni (Partii Naleraq Naalakkersuisunit suli tunuanngitsoq) isumaqatigiissutigineqartumi, tamanna ima sukannersumik oqaasertalerneqarpoq:
– Kalaallit Danmarkimut peqqissariartarnerat nunatsinnut nuunneqartariaqarpoq. Danmarkimi ullumikkut suliaritittarnerit eqqarsaatigalugit minnerpaamik pitsaaqataanik nunatsinni ingerlanneqarsinnaanissaat siunertaralugu periarfissat pilersinniarneqassapput, naalakkersuisoqaatigiinnissamik tunngavissami allassimasoqarpoq.
Anguniakkalli qaffasissut, isumaqatigiissummit ersersinneqartut, piviusorsiortuunnginnerat nassuiaammi nutaami, Nunatta Nakorsaaneqarfianit, Peqqissutsimut Naalakkersuisoqarfik suleqatigalugu, suliarineqarsimasumi, ersersinneqarpoq.
Tassani peqqissariartut angalasarnerannik iternga tikillugu nalilersuisoqarsimavoq, akissullu qinikkanut napparsimasunik Københavniliartitsisarnermik unitsitserusuttunut qiimmaallannartuunngilaq.
– Neqeroorutit nunatsinnut nuunneqarnissaannut periarfissat killeqartorujussuunerat misissueqqiussaarnerup takutippaattaaq. Akimmiffiit annersaat tassaavoq innuttaasut amerlassusaat, immikkut ilisimasaqarfinni qaffasissuni misissuinernik nakorsaanernillu pilersitsisinnaanissamut inuit 56.000-it ikippallaarujussuarput. Tamanna aningaasaqarnikkut ilinniagassutsikkulluunniit illersorneqarsinnaanavianngilaq, Peqqissutsimut Naalakkersuisoqarfik allappoq.
Aviisimi AG-mi atuarnerusinnaavutit. Aviisi uani pissarsiariuk: