Peqqarniitsumik pisoqareersoq: Illoqarfik politeeqarfeqartariaqarpoq
Politikkeri isumaqarpoq, Kangaatsiaq illoqarfiit allat assigalugit politeeqarfeqartariaqartoq. Ministerilli akissutaata takutippaa, tamanna pisinnaanngitsoq.
Septembarip qaammataata naalernerani Kangaatsiami angut peqqarniitsumik persuttaammat inuit arlallit ajoquserneqarsimapput. Ilaatigut inuk ataaseq ajoqusingaatsiarsimammat Nuummut aallarukkasuarneqarsimalluni.
Taamatut pisoqarmat folketingimi ilaasortap Aaja Chemnitz Larsenip (IA) Kangaatsiaq Kalaallit Nunaanni illoqarfiit allat assigalugit politeeqarfeqartariaqalinnginnersoq ukkatarilersimavaa.
Taassuma oqaatigaa politeeqarfeqartariaqalernera piffissaanngortoq:
- Kangaatsiaq illoqarfittut akuerisaavoq, taamaammat politeeqarani kommunefogedeqarnera eqqumiilaarpoq. Soorunami politiit sinniisoqartinneqarnerat pitsaasuuvoq, kommunefogedelilli politiitut piginnaasaqaratillu ilinniagaqarsimanngillat.
- Kangaatsiami politeeqarfeqalernissaa inissaminiippoq, politiimmi nalunaaquttap akunnera ataaseq atorlugu anngunniartussaasarput, taanna oqarpoq.
Politiit: Kommunefogedeqarneq naammappoq
Politikkerip taamaammat Danmarkimi inatsisinik atuutsitsinermut ministerimut Nick Hækkerupimut tamanna qanoq isigineraa apeqqutigisimavaa.
Akissulli naapertorlugu illoqarfimmi politeeqarfiliortoqarnianngilaq, ministerip Kalaallit Nunaanni Politiit suliaq pillugu naliliisimanerat tapersermagu. Politiit isumaqarput, Kangaatsiami pinerluuteqartoqartarnera eqqarsaatigalugu illoqarfimmi kommunefogedeqarnera naammattoq:
- Pinerluuteqartoqartarnera eqqarsaatigalugu ilisimatitsissutigineqarsinnaavoq, 2021-mi septembarip 25-ani Kangaatsiami immikkut peqqarniilluinnartumik pisoqarsimasoq. Pisup tamatuma malitsigisaanik inuk ataaseq toqutseriarsimasutut unnerluunneqarsimavoq. Pisumut tassunga atatillugu Aasianni politiit nalunaaquttap ataatsip missaata ingerlanerani Kangaatsiamut apuussimapput.
- Aasianni politiinit ilisimatitsissutigineqarsimavoq, Kangaatsiami aatsaat taamak peqqarniitsigisumik pisoqarsimasoq, Kangaatsiamilu maannamut peqqarniitsumik imaluunniit akulikitsumik pinerluuteqartoqarneranik politeeqarfik takusaqartarsimanngitsoq. Tamanna tunngavigalugu Kalaallit Nunaannit Politiit nalilersimavaat, Kangaatsiami kommunefogedeqarnera naammattoq, Kalaallit Nunaanni Politiinit oqaatigineqarpoq.
Kommunefogedit marluk angallallu sukkasuuliaq
Kalaallit Nunaanni Politiit ilanngullugu ilisimatitsissutigaat, politiit sinnerlugit kommunefogedit pingasut Kangaatsiami sulisorineqartartut.
Maannakkorpiaq marluk inuttaqartinneqarput, atorfiulli pingajuat 2021-mi juunip 30-anili inuttaqarsimanngilaq.
Politiit tamatuma saniatigut oqaatigaat, Kalaallit Nunaanni Politiit 2021-mi sukkasuuliamik angallatitaarsimasut Aasianni angerlarsimaffeqartinneqartumik.
- Sulisut politiitut ilinniarsimasut Aasianni politeeqarfimmiit angallat nutaaq atorlugu nalunaaquttap akunnerata ataatsip ingerlanerata missaani Kangaatsiamukapallassinnaapput, politiit allappu.
Inatsisinik atuutsitsinermut ministeeriaqarfimmit ilisimatitsissutigineqarpoq, Kangaatsiami politeeqarfiliortoqassanersoq pillugu Naalakkersuisut ukiuni kingullerni oqaloqatigineqarsimanngitsut.