Peqatigiillutik Nunarput Uefa-mut ilaasortanngortinniarpaat

Kalaallit Nunaat nunarsuarmi nunat kingulliit ilagaat nunani tamalaani arsaattartut kattuffiannut ilaasortaanngitsut. Maanna Danmarkimi Kalaallit Nunaannilu arsaattartut kattuffii siullermeersumik suleqatigiissutigilerpaat, peqatigiinnissamik isumaqatigiissuteqarlutik, Nunatta europami arsaattartut kattuffiannut (Uefa-mut) ilaasortanngornissaa, taannalu aqqutigalugu nunani tamalaani arsaattartut kattuffiannut (Fifa) ilaasortanngorsinnaalluni. Siunniunneqarpoq siullermut, tassa Uefa-mut, 2020 nallertinnagu ilaasortanngornissaq, Politiken arfininngormat allappoq.

»Ilaasortaannginnerpummi nuannarinngeqaarput. Takusinnaalluarparput amigaateqaqaluta. Amatøriusugut iluamillu arsaattarfeqarata. Tamakkuli allanngortittariaqarpavut«, GBU-p siulittaasua John Thorsen Politiken-imut oqarpoq, innersuussutigalugit ilaasortanngornissamut piumasaqaatit arlallit, nunani tamalaani arsaattartut kattuffiata ilaasortaminut nutaanut piumasarisartagai, tamatumani ilanngullugit naammaginartunik arsaattarfeqarneq.

»Kalaallit piumappata taava aamma isumaqarpunga ikiussallugit pisussaaffeqartugut. Ilaasortanngornissamulli Uefa-p piumasaqaataanik naammassinninnissatsinnut amigaateqarpugut«, DBU-p siulittaasua Jes Møller Politiken-imut oqarpoq. Taannalu isumaqarpoq illua'tungeriit isumaqatigiissut aggustimi atsioreersinnaagaat. Isumaqatigiissummi ilaatigut ilaapput aningaasatigut ikiorsiineq, pingaartumillu Brøndby-mi Fodboldens Hus-imit immikkut ilisimasanik ikiorsiineq, Politiken paasissutissiivoq.

Jesper Møllerip oqaaseqarnera DBU-mi ingerlaffimmik allannguinermik takutitsineruvoq, tassa DBU-p manna tikillugu Kalaallit Nunaata ikionissaa nangaassutigisimagamiuk, Politiken allappoq. 2011-mi taamanikkut DBU-mi siulittaasoq Allan Hansen oqarpoq isumaqarluni »nuna ilaasortanngornissaminut periarfissaqanngitsoq«.

Siumup, Demokraatit Atassutillu decembarimi naalakkersuisunngortitsigamik isumaqatigiipput kalaallit nunani tamalaani arsaattartut kattuffiannut ilaasortanngorniarnerat tapersersorniarlugu, tamannalu peqatigalugu qulakkeerlugu maanna arsaattarfiit ujaraaqqanik qallikkat ivigaasanik qallikkanik - kommunini sisamani tamani - taaserneqarnissaannut aningaasanik immikkoortitsisoqarnera.

Politiken-ilu allappoq sapaatip akunnerani kingullermi suli pitsaanerulersoq Inatsisartut aningaasanut inatsisikkut 1 million koruuninik immikkoortitsimmata, illoqarfiit pingaarnersaanni Nuummi nunap arsaattarfissaata nunanut tamalaanut naleqquttup pilersaarusiorneqarnissaanut.