Peqatigiiffiup Tasiilami meeqqat ikiortariaqartut ikiorniarai
Najortit taakkuupput meeqqanik ikiugassaanerpaanik ikiuunniartartut. Peqatigiiffik Kalaallit Meerartaat ulluni makkunani Tasiilamiippoq, meeqqat kommunip sullitai pillugit najorteqartitsilissallutik pikkorissaassallutillu.
Peqatigiiffik Kalaallit Meerartaat maanna Tasiilamiippoq nakortinik pikkorissaassalluni. Najortit meeqqanut kommunimit isumaginninnermik sullinneqartunut illersuisuusassapput. Meeqqat angerlarsimaffimminniit allamut nuutinneqartut siunissami najorteqartinneqartalissallutik.
- Najortinik illersuisoqartitsineq meeqqat ikiorneqarnissamik pisariaqartitsinerpaat sernissorneqarnerannut tunngaviuvoq, Peqatigiiffik Kalaallit Meerartaata allattoqarfiani pisortaq Nike
Berthelsen oqarpoq.
Najortit marluk sinniisussallu marluk pikkorissarneqassapput, inatsisit atuuttut pillugit ilinniartinneqassallutik meeqqanillu oqaloqateqarnissamut ilinniartinneqassallutik.
DR-ip piviusulersaarutaa Byen hvor børn forsvinder´, kinguaassiutitigut kannguttaatsuliorfigineqartarneq imminullu toquttarneq pillugu piviusulersaarusiaasoq, takutinneqareersorlu Tasiilami meeqqat atugaat maluginiarneqaqqilerput.
- Meeqqa inersimasuukkajuttunit meeqqanik paarsisussaagaluartunit sumiginnagaasarnerat innarlerneqartarnerallu alianarlunilu akuersaarneqarsinnaanngilaq. Tamanna ilaginnaanerujussuuvoq, kikkullu tamarmik; suliniaqatigiiffiit, kommunit innuttaasullu ilaginnaanerujussuit pinaveersaartinneqarnissaannut iliuuseqartoqarnissaanut suleqataassapput. Tamatumani inersimasut akisussaaqataanikkut iliuuseqarnissaminnut piareersimasinnaasut pisariaqartinneqarput. Tamatumunnga atatillugu aaqqiissuussaq Najorti inersimasuusugut akisussaaqataanikkut pimoorussilluinnarluta iliuuseqarnissatsinnut tunngaviusinnaasut
ilagaat, Nike Berthelsen oqarpoq.
Nike Berthelsen Sermitsiaq.AG-mut ilisimatitsivoq Peqatigiiffik Kalaallit Meerartaanneersut maanna Tasiilamiilereersut, najortit sulinerat pillugu ilisimatitsiartorlutik.
Suleqatigiinnissamut isumaqatigiissut
Kommuneqarfik Sermersooq aammalu Peqatigiiffik Kalaallit Meerartaat ulluni makkunani suleqatigiinnermut isumaqatigiissusiuleruttorput. Suleqatigiinnermut isumaqatigiissut Kommuneqarfik Sermersuumi meeqqat kommunimit isumaginninnermik sullinneqartut Najortimik
illersuisussaqartinneqartalernissaannut tunngaviussaaq.
Tamanna isumaqarpoq meeqqat angerlarsimaffimminniit arsaarinnissutigineqartussanngortut illersuisoqarsinnaalissasut, suliami tusaaneqarlutillu peqataatinneqarnissaat anguniarlugu. Inatsi malillugu meeqqat angerlarsimaffimmiit arsaarinnissutigineqartussaasut najorteqarsinnaapput. Peqatigiiffik Kalaallit Meerartaatali meeqqat amerlanerusut najorteqarnissaat angorusuppaa.
- Meeqqat kikkulluunniit pisariaqartitsisut najorteqarnissaat kissaatigigaluarparput, kommunilu tamassuminnga neqeroorfigaarput. Kommunilli maannakkumuungallartoq kissaatigaa meeqqat angerlarsimaffimmit arsaarinnissutigineqartussat kisimik najorteqartinneqassasut, tamannalu malittussaavarput, Nike Berthelsen oqarpoq.
Paasititsiniaaneq
Kommuneqarfik Sermersooq peqatigalugu suleqatigiinnissamut isumaqatigiissut isumaqarpoq, meeqqat kommunimi najugaqartut angerlarsimaffiup avataanut inissinneqartussanngorunik najorteqarsinnaalissasut. Isumaqatigiissutit tassunga assigusut Qeqqata Kommuniani Kommune Kujallermilu aamma isumaqatigiissutigineqareersimapput.
Peqatigiiffik Kalaallit Meerartaat Tasiilami innuttaasunik unnugu ataatsimiisitsissaaq, najortit suliaat pillugit innuttaasut paasisaqarnerusinnaassallutik. Tasiilami Alivarpimmi angajullerni atuartut najortit suliaat pillugit aamma paasititsiniaaffigineqartussaapput.