Peqatigiiffissap kinguaassiutit atornerat ukkatariniaraa
Kalaallit Nunaat suiaassutsimut kinguaassiutillu atornerannut tunngatillugu oqaatsitigut taaguutinik amigaateqarpoq. Peqatigiiffissap tamanna allanngortinniarpaa.
Nunat arlallit kinguaassiutit atornerinut suiaassutsikkullu kinaassutsimut tunngatillugu oqaatsinik taaguutinillu arlalinnik peqareerput. Kalaallit Nunaannili taamaattoqanngilaq, taamatullu aamma inunnut inunnit amerlanerussuteqartunit allatut suiaassutsimikkut kinaassusilinnut pisinnaatitaaffiit naligiinnerunissaannut suliassat amerlammata.
Qillaq Olsen inuiaqatigiinnit amerlanerusunit allatut suiaassutsikkut kinaassuseqartunut peqatigiiffimmik pilersitsinissamik suliniuteqartut ilagaat.
Peqatigiiffik Sipineq Kalaallit Nunaanni inuiaqatigiinni 2SLGBTQIA+-nut peqatigiiffiusussaq nalinginnaasumik ataatsimeersuarnissamut 9. marts qaaqqusivoq.
- Assersuutigalugu danskisut oqaatsit atorneqartartut nutserneri aamma taaguutit assigiinngitsut nassuiaasersornerannik suliaqarneq aallartereerparput. Assersuutigalugu suliffeqarfiit oqaatsinut assigiinngitsunut aamma suiaassutsikkut kinaassuseqarnermut tunngasunik nassuiaatinik amigaateqartarnerat takussaasarpoq. Taamaammat pisariaqartitsisoqarpoq, Qillaq Olsen, Sermitsiaq.AG-mut oqarpoq.
Suleqatigiinneq aallartittoq
Sipineq+-imi peqatigiiffiliorniartut Nutserisutut Oqalutsitullu Ilisimatusarfimmi ilinniarfimmik suleqateqalereerpoq, nutserinissamut nassuiaasiornissamut siunnersuinermullu tunngatillugu Oqaasileriffik oqaloqatigineqarpoq.
Nunatsinni peqatigiiffiit LGBTQ+, Greenland+ pioreerput. Peqatigiiffik alla pisinnaatitaaffinnik suliniuteqarnermut nukittorsaataassasoq, Qillaq Olsen ilisimatitsivoq.
- Peqatigiiffimmik tamanut peqataatitsisoq pisariaqartinneqarpoq. Amerlanerutilluta nukittunerussaagut. Peqatigiiffimmi nutaami kikkut tamarmik peqataatippavut, inuit suiaassuseqatiminoortuunngitsut uagutsinnut ilaasortanngornissamik soqutiginnittut ilanngullugit. Suliniutinilu arlalinni peqatigiiffik pioreersoq suleqatigereerparput, Qillaq Olsen nassuiaavoq.
Peqatigiiffissap aamma ataataaqataasut meerartaarnerminni sulinngiffeqartarnissaat, uumissuilluni pinerlunnermut inatsiseqalernissaa, eqqarsartaatsikkut peqqissuunissaq, itinerusumik kinguaassiutit pillugit atuartitsisoqartarnissaa kiisalu 2SLGBTQIA+-t nunatsinni avatangiisaanni eqqarsartaatsikkut peqqissuunissaq sulissutiginiarpai.