Peqatigiiffik: Ilaqutariit kalaaliusut danskit aaqqissuussaaneranni paatsoorneqartutut misigisarput
Danmarkimi Peqatigiiffik Kalaallit Meerartaasa akulikitsumik misigisarpaat, paatsuuisarnerit ilisimasaqanngittarnerillu Danmarkimi kalaallit meerartaannik isumaginninnikkut eqqortumik iliuuseqarfigineqarnissaannut aporfiusartut.
Social- og Indenrigsministeeriaqarfiup kisitsisaatai naapertorlugit, kalaallit meerartaat inuusuttortaallu Kalaallit Nunaanni inunngorsimallutik Danmarkimi najugaqartut syv procentii 2019-ip naanerani angerlarsimaffiup avataanut inissinneqarsimasuupput.
Danmarkimi meeqqanut allanut sanilliutissagaanni, taakku én procentiinnaai angerlarsimaffiup avataanut inissinneqarsimasuupput.
- Tassa Danmarkimi kalaallit ilaqutariit kommuni suliaqarniarluni ilungersunarnerpaamik akuliuttartoq misigisarpaat, Peqatigiiffik Kalaallit Meerartaasa siulittaasuat Puk Draiby Alting.dk-mi allaatigissaqarluni allappoq.
Suliap pitsaasumik ingerlanneqarnissaanut aporfiusartoq
Peqatigiiffiup kalaallit ilaqutariit meeqqallu isumaginninnermi oqartussanit immikkut eqqumaffigineqartut ullut tamaasa attaveqarfigisarpai.
- Inissiinissamik suliaqarnermut atatillugu tamanna pisinnaavoq, amerlanertigulli meeqqanik ernummateqarluni nalunaaruteqartoqarsimanerni sulia ilungersunalaartut pineqartillugit attavigineqartarput. Pisuni tamakkunani ajoraluartumik misigisarparput, suliap pitsaasumik ingerlanneqarnissaanut kulturip oqaatsillu assigiinnginnerat aporfiusartut, Puk Draiby erseqqissaavoq.
Pitsaasumik ikiorsiisarneq
Paatsuuisarnerit ajornerpaamik kinguneqaatigisinnaasarpaat, ilaqutariit Kalaalit Nunaannersut naapertuutinngilluinnartumik iliuuseqarfigineqarnerat.
- Inissiineq meeqqamut pitsaanerpaamik aaqqiissutaasinnavoq, amerlanernilli inissiisoqarnissaanik ukkataqartarnerup ilaqutariit meeqqallu allamik kulturillit allatullu oqaasillit inissinneqartartut amerlanerpaanngortissinnaavaai.
- Taamatut pisoqartillugu meeqqat qitiutinneqarneq ajorput, akerlianik ajunngitsumik meeraanissamut pitsaasumik ikiorserneqarnissamik pisariaqartitsinerpaasut sumiginnarneqartarput, Puk Draiby oqarpoq.