Peqatigiiffik Uummatit siullerpaamik immikkoortortaqarfittaarpoq

Uummatit Ilulissani immikkoortortaqarfittaarpoq

Peqatigiiffik Uummatit/Foreningen Hjertelivet siullerpaamik immikkoortortaqarfittaarpoq. Siulersuisuni ilaasortat marluk, Ilulissanilu najugaqartut Peqatigiiffik Uummatit/Foreningen Hjertelivet ukiut marluk matuma siornatigut pilersinneqarmalli siulersuisuni ilaasortaasimapput. Taamaammat nuannaarutigeqaarput Peqatigiiffik Uummatit/Foreningen Hjertelivet immikkoortortaqarfiat siulleq Ilulissani pilersinneqarmat, siulittaasoq Elise Bruun oqaaseqarpoq.

Inuit qulit missaannik amerlassusillit, nammineq uummatimikkut nappaateqartut imaluunnit uummalluttumut ilaqutaasut ataatsimiisitsinermi najuupput. Ataatsimiinnermi suleqatigiissitaliaq 3-4 inuttalerneqartoq Ilulissani immikkoortortaqarfimmik aqutsisussaq pilersinneqarpoq. Suleqatigiissitaliap sumiiffimmi aaqqissuussinerit assigiinngitsut pilersaarusiortassavaat.

Peqatigiiffik Uummatit/Foreningen Hjertelivet Sisimiuni immikkoortortaqarfimmik pilersitsinissaq aamma pilersaarutigaa, paasisitsiniaallunilu ataatsimiissitsisoqareersimavoq. Aaammattaaq Sisimiuni Peqatigiiffik Uummatit/Foreningen Hjertelivet immikkoortortaqarfeqalernissaa tapersersorluarneqarpoq.

Peqatigiiffik Uummatit/Foreningen Hjertelivet Oktoberip 19.-ani Nuummi aningaasanik katersiniarluni charity-mik aaqqissuussaqarpoq. Aaqqissuussinermi siunertarineqarpoq, ukiumi 2020-imi peqatigiiffimmi ilaasortaasut napparsimavimmilu passunneqarnissamik pisariaqartitsisut ilaqutaasup angalaqataanissaanut aningaasanik tapiissuteqartarnissaq.

Powered by Labrador CMS