Peqatigiiffik nutaaq: Sakkutuujusimasut Kalaallit Nunaani najugallit peqatigiiffeqalersut
Sakkutuujusimasut Kalaallit Nunaanni najugallit marlunngornermi juunip arfineq-pingajuaanni ataatsimeersuarput, tassani siulersuisussanik nutaanik taasisoqarlunilu ileqqoreqqusassanik aalajangersaasoqarpoq.
Nunani tamalaani sakkutuut ikinnerpaamik ulluni 28-ni suliassaannik isumaginnikkiartortinneqarlutik aallartitaasarsimavit? Aallartitaasarsimaguit nunami maani kisimiinngilatit. Illersornissaqarfiummi sakkutuujusimasut 106-it Kalaallit Nunaanni najugaqartut nalunaarsorsimavai. Taakkunannga 60-it Nuummi najugaqarput, sinnerilu sineriammi siammarsimallutik.
Peqatigiiffik pilersinneqaqqammersoq, Grønlands Veteraner, aqqutigalugu sakkutuujusimasut Kalaallit Nunaanni najugaqartut 100-t sinnerlugit amerlatigisut taakkulu ilaqutaasa imminnut ataqatigiilluarnerat nukittorsarneqarniarpoq.
- Juullikkunni nerersuaqatigiittareerpugut aamma nereqatigiittarlutalu ataatsimuualaaqatigiinnissamut qaaqqusisarpugut. Sumiiffinni assigiinngitsuni suliffeqarfiit pulaartarsimavagut. Ataatsimoorluni sammisassanik suliaqarniarsarivugut, siulittaasunngorlaaq Rasmus Lohse Sermitisaq.AG-mut oqarpoq.
Siulersuisut timersortitsisarnissamut akisussaasumik ilaqassasut
Peqatigiiffimmit sakkutuujusimasut Kalaallit Nunaanni najugaqartut ullumikkut inissisimaffiat misissorneqassaaq, peqatigiiffillu siunissami qanoq ingerlanneqassanersoq paasiniarneqassalluni.
Peqatigiiffik siulittaasoqarlunilu siulittaasumut tullersorteqarpoq kiisalu aningaaserisoqarlunilu peqatigiiffimmi timersornikkut sammisassaqartitsinissamut akisussaasoqarpoq.
- Ataatsimoorluta sammisartagassatsinnik aaqqissuussiniarpugut. Timersortarfimmi timersornerit pisuttuaqatigiinnerillu allallu aaqqissuunniarlutigit. Lars Aalund Kruuse tamakkuninnga suliaqarusussuseqartuuvoq, taamaammat timersortitsisarnissamut akisussaasutut toqqarsimavarput, siulittaasoq Rasmus Lohse oqarpoq.
Siulersuisunngortut tassaapput:
Siulittaasoq: Rasmus Lohse
Siulittaasup tullia: Claus Wheler
Aningaaserisoq: Henrik Philipsen
Ilaasortaq timersornermullu akisussaasoq: Lars Aalund Kruuse
Ilaasortaq: Ditte Nonno-Nielsen
Sinniisussaq siulleq: Tom Olsen
Sinniisussap tullia: Claus Jordening