naalagaaffeqatigiinneq
Peqatigiiffik Naalagaaffeqatigiiffik: Inuiaqatigiit ineriartortinneqassapput
- Namminiilivinnissamut oqallinneq suli pisariaqanngitsoq inuiaqatigiit paasissagaat pisariaqarpoq: Inuiaqatigiilli sukkut tamatigut pitsaasumik ineriartortinneqarnerat pingaarnerusoq maannakkut paasineqartariaqarpoq, Peqatigiiffik Naalagaaffeqatigiiffimmit oqaatigineqarpoq
Naalagaaffeqatigiinnerup iluani nunat suleqatigiinnerulernissaat paaseqatigiinnerulernissaallu Peqatigiiffik Naalagaaffeqatigiiffimmit anguniarneqartuuvoq.
Peqatigiiffik Naalagaaffeqatigiiffimmit pingaartutut isigineqarpoq Kalaallit Nunaata sukkut tamatigut pitsaasumik ineriartortinnerani innuuttaasut pimoorullugit ilanngunneqarnissaat. Tamannalu Kalaallit Nunaanni politikkerinut kajumissaarutigaat.
- Nalunngilarput Kalaallit Nunaanni partiit tamarmik imaluunniit amerlanersaasa Kalaalit Nunaata namminiilivinnissaa sulissutigigaat. Taamatut siunertaqarneq paasinarpoq ajortortaqarnanilu. Pingaaruteqarporli inuiaqatigiit paasilluassagaat aatsaat taanna siunisssami ungasissumi pisinnaasoq, Peqatigiiffik Naalagaaffeqatigiiffimmi siulittaasoq Nauja Lynge allappoq.
Naalagaaffeqatigiinnermit inigaanni suut kingunerutaasinnaanersut Kalaallit Nunaanni innuttaasut ilisimasariaqaraat peqatigiiffimmit pingaartinneqarpoq ilisimatitsissutigissallugu.
Aningaasaateqarnerit pissakinnerillu
- Pisuut piitsullu akornanni assigiinnginneq annertusiartuinnarpoq, socialitigullu ajornartorsiutit annertoqalutik. Piffissanngorsoraarput inuiaqatigiit paasitinneqarnissaat ullumikkut Naalagaaffeqatigiiffimmiit aninissamit pisinnaanngitsoq tamakku iluarsineqartinnagit. Kalaallit Nunaat namminiilivinnissamut piareersimaleruni namminiilivikkumaarpoq. Namminiilivinneq qanoq paasineqarsinnaanersoq aamma oqaluuserineqarumaarpoq, massakkulli iluaqutaaginnassaaq sukkut tamatigut namminersornerulluni oqartussaanermik iluarineqartutut inuiaqatigiinniit isiginnissinnaanermik, Nauja Lynge oqarpoq.
Nauja Lyngep oqaatigaa 'inuiaqatigiit paasilluassagaat namminiilivinnissamut oqallinneq pisariaqanngitsoq maannakkut, inuiaqatigiilli sukkut tamatigut pitsaasumik ineriartortinneqarnerat pineqartoq pingaarnerusorlu.'
- Isumaqarpuguttaaq pingaartuusoq eqqortuusorlu, Kalaallit Nunaata Danmarkimut atassuteqarnera nukittorsarneqarnerulissasoq. Suleqateqarneq, pisariaqarpallu Naalagaaffeqatigiinnerup iluani ikiorneqarnissamik qinnuteqarneq pissusissamisuuginnartoq, taamatullu aamma Kalaallit Nunaanut sukkut tamatigut iluaqutaaginnassasoq, peqatigiiffimmit 2014-mi aggustimit pilersinneqartumit Nauja Lynge oqarpoq.