Peqatigiiffik Kalaallit Meerartaat 95-iliivoq
Ajornartorsiutit allanngorarput, kisianni suliaq taannaajuarpoq,peqatigiiffiup allattuunera taama oqarpoq.
Januaarip 14-anni Peqatigiiffik Kalaallit Meerartaat 95-iliilluni nalliuttorsiorpoq.
- Ukiunik 95-inngortorsiornitsinnut atatillugu nukippassuarnik atuinngilagut, ukiunik 100-nngortorsiornissatsinnut tamakkua toqqorpavut. Kisianni ukiunik 95-inngortorsiornerput kingumut qivialaarnissatsinnut pissutissaqarluarpoq, allattuuneq Puk Draiby, nutaarsiassatut allakkami oqarpoq.
Peqatigiiffik palasip Jens Chemnitzip Kalaallit Nunaanni angalasarnerinit aallaaveqarput.
Meeqqat ikiortariallit pillugit oqaluttuaq minnerunngitsumik palasip kalaallip Jens Chemnitzip oqaluttuaraa. Taassuma angalanermini Sorsunnersuup Siulliup nalaani meeqqat angoqqaaqanngitsut naapissimavai, qiaatigalutik paarmaqutinik katersisut kaakkunaaminiassagamik. Palasip oqaluttuai attortissutigineqarput, minnerunngitsumik Rigsdagimit angalaqataasunit, Kalaallit Nunaanni 1920´ikkut aallartisimaleranni angalasimasunit. Angalaqatigiinnerup kingunerisaanik taamanikkut peqatigiiffik 1924-imi januaarip 24-anni aallartinneqarami taaguutigaa ´Kalaallit Meerartaat Ikiorniarlugit Peqatigiiffik’.
Meeqqanut peqqissaaviit
Peqatigiiffik Kalaallit Meerartaat taamaattumik januaarip 14-anni 1924-imi atulerpoq – aappaaguanilu Maniitsumi meeqqanut peqqissaavik ammarpaa. Taamanikkut meeqqat sakialluummik napparsimalersimasut peqqissarsinnaalersimapput.
1929-imi Peqatigiiffik Kalaallit Meerartaat nunarsuarmi avannarpasinnerpaamik meeqqanut angerlarsimaffimmik ammaavoq, Uummannamilu meeqqanut peqqissaaviliorluni.
- Ingerlaannarluta takusinnaasimavarput meeqqat puallarserneqaannaratik ikiorserneqartariaqartut. Aammali alliartortariaqartut, ‘iluaqutaallutik innuttaaqataalernissaq’ anguniarlugu. Ullumikkut taamatut oqarneq ajorpugut, kisianni, ilinniagaqalernissamut kajumissuseqarnissaq siunertaralugu Peqatigiiffik Kalaallit Meerartaat ullumikkut suliniutinik sammisaqarpat, taava soorunami pitsaasumik tunniusseqataanissaq pineqarpoq – nammineq aammalu Kalaallit Nunaat eqqarsaatigalugu, Puk Draiby oqarpoq.
Peqatigiiffik suli pisariaqartinneqartoq
Kingorna peqqissaaviit amerlanerusut pilersinneqarput, peqatigiiffiullu aamma nunatsinni meeraaqqeriviit siulliit pilersippai. Kingusinnerusukkut inuusuttut ornittagaat pilersinneqarput, kingullermillu aamma meeqqat najorteqartarnissaannut aaqqiissut Najortimut ilaatigut siammarterisuuvoq.
- Ukiunik 95-inngortorsiornermut atatillugu kingumut qivialaarpugut, aamma nalinginnaasumik maannakkut siunissamullu tunngasut nukinnik atuiffigisaraluarlugit. Immaqa kissaatigineqarsinnaagaluarpoq, ukiut unnorujungajaat sulereerluta pisariaaruttugut. Kisianni ajoraluartumik taamaanngilaq. Tassami sakialluup aqunneqarsinnaaleraluartoq, taava kalaallit meerartaat ullumikkut allatigut ikiorserneqarnissaminnik pisariaqartitsipput. Namminneq meeqqatut pitsaasumik sullinneqarnissaminnut. Angerlarsimaffimminni ungaseqisumi ilinniakkaminnik nuannarisaqarnissaminnut. Nunarsuarmioqataanissaminnullu, Puk Draiby oqarpoq.