Kangaatsiaq
Peqatigiiffik imermik amigaateqarnermik ernumassuteqartoq
Illoqarfimmi imeqarniarneq ajornartorsiutaammat, Kangaatsiami aalisartut piniartullu peqatigiiffiat maanna iliuuseqartoqarnissaanik piumasaqarput
Sermitsiaq.AG-p sapaatip akunnerani kingullermi allaaserinninneratut, imermik amigaateqarneq peqqutigalugu Kangaatsiami Royal Greenlandip tunisassiorfiani sulisut 20-t angerlartiinnartariaqarsimasut.
Tamannalu illoqarfimmi eqqasuuteqarnermik pilersitsivoq, ilaatigut ajornartorsiummut aaqqiiniartoqarneranut amigarpallaartunik illoqarfimmi ilisimatitsineq peqqutigalugu, aammalu tunisassiorfik annertuumik eqqugaammat.
Maannakkorpiaq iliuuseqaqqusisut
Maanna illoqarfimmi aalisartut piniartullu peqatigiiffiat, KAPP, imermik kipiluttunartorsiorneq iliuuseqarfigeqqullugu Nukissiorfiit, Royal Greenland, Qaasuitsup Kommunia aamma KNAPK allakkanik ammasunik allagaqarfigaat.
- Pisortat ajornartorsiummut iliuuseqarnissaat sakkortuumik piumasaraarput. Tusarparput imeqarfipput ukioq naatinnagut nungussinnaasoq. Taamaattoqassappat illoqarfimmiittut tamarmik eqqorneqassapput, peqatigiiffiup siulittaasua Nikolaj Steenholdt allappoq.
Atuaruk: Imermik amigaateqarneq peqqutigalugu sulisut angerlartinneqartartut
Paasissutissat amigartut
Peqatigiiffik nammineerluni aaqqiinissamut siunnersuuteqarpoq.
- Uagut siunnersuutigisinnaavarput Tunulliup tasianiik Kangaatsiaq imeqalissasoq, tassami misissuinerit takutissimavaat Tunulliup tasia Ippernat tasianinngaanniit itinerullunilu pitsaassutsimigut ajunnginnerusoq, KAPP-imi siulittaasoq siunnersuuteqarpoq, taanna Nukissiorfiit ajornartorsiummut tunngatillgu paasissutissiinerat annikimmat aarlerivoq.
- Ajornartorsiut annertusivallaartinnagu iliuuseqarfigipallanneqarnissaa kissaatigaarput, Nikolaj Steenholdt allappoq.
Aamma atuaruk: Nunaqarfinni erngup pitsaassusia ilisimaneqanngilaq