Peqatigiiffiit: Angalanissamut aningaasanik tunisigut

Kajumissutsimikkut sullissisut naapinnissamut periarfissaginnerulertuugunik, sulineq nukittorsarneqassasoq, Røde Kors aamma Peqatigiiffik Kalaallit Meerartartaat isumaqarput.

Kajumissutsimik sulisut peqatigiiffiisa naapissinnaagaangamik sulinerannut nukittorsaataasarpoq. Kisianni Nuup avataaniittunut tamanna ajornakusoorpoq. Peqatigiiffik Kalaallit Meerartaat (FGB) aamma Kalaallit Røde Korsiat ataatsimut tusagassiuutinut nalunaarumminni taama allapput.

– Avitseqateqartarnitsigut ilikkagaqangaatsiartarpugut, isumassarsiassatigut misilittakkatsigullu. Kajummissutsimikkut sullissisartunut allanut attaveqaateqarneq, kattuffiit allat kiisalu kattuffiit iluminni immikkoortortaat allat namminerisatsinnillu kattuffigut atugaasarput kattuffit kajuminnikkut ingerlassat nukittorsaaviginissaannut. Kattuffitsinnillu ineriartortitsinissani kajumissutsimikkullu sullissisartunik akuutitsinissani, FGB-mi allattoqarfimmi ingerlatsisoq Nike Berthelsen aamma KRK-mi siulittaasoq Christina Tønder Bell taama oqariartuuteqarput.

Aningaasanut inatsimmi agguaassassat

Aappaagumut aningaasanut inatsimmi angalanissamut agguaassassanik immikkoortitsisoqarnissaanik, peqatigiiffiit taakku marluk taamaattumik siunnersuuteqarput.

- Kajumissutsitsigut sullissisarnigut aningaasartuutitaqanngillat angalanissagulli aningaasartuutitaqarput. Aningaasartuutitaqarnerisa killilertarpaat qanoq naapeqatigiikulasinnaanerput. Imaappoq taava naapeqatigiikulasinnaannginnatta immikkoortortat kattuffiillu akunnitsinni– nuna tamakkerlugu – inunnik atugarliortunik sullissisinnaanitsigut angusassarisinnaasagut killilingaareertarput.

- Ineriartortitsisinnaassuseq killilerneqaannarani immikkkoortortaqarfinniik immersorneqarsinnaaneq ilanngulluni aamma killiligaasarpoq.

- Ullutsinni avitseqateqartarnerit oqarasuaatikkut, mailikkut facebookikkullu pisarput. Angusaqaataanerpaasarpulli inuttut naapilluni oqaloqatigiittarnerit. Itisiliilluni oqaloqatigiinnissamut piffissaqarluni, apeqqarissaarsinnaalluni qulequtarisanut itisiliisinnaalluni.

Ukioq manna aningaasanut inatsimmi eqqumiitsuliortut angalanerinut assersuutigalugu aamma timersornikkut aaqqissuussanut aningaasanik immikkoortitsisoqarnikuuvoq. Peqatigiiffiit taakku marluk peqatigiiffinnut kajumissutsimik suliaqartunut taamatut assingusumik aaqqiissuteqartoqarnissaa siunnersuutigaat.

Powered by Labrador CMS