Københavnimi toqusoq
Peqatigiiffiit: Angerlarsimaffeqanngitsut soqutigineqarneq ajorput
Danmarkimi angerlarsimaffeqanngitsut peqatigiiffiata angummik toqusoqareerneratigut oqartussaasunik isornartorsiuipput
Angerlarsimaffeqanngitsut ikiortariallit pillugit ambulancenut sianertoqaraangat soqutigineqarpiarneq ajorput.
Danmarkimi angerlarsimaffeqanngitsut peqatigiiffiat, Sand, aamma Morgencafé for Hjemløse i København, oqartussanut isornartorsiuipput. Taamaasiorput angut kalaaleq 32-nik ukioqartoq ataasinngormat toqunerata kingorna.
Ambulancenut sianertoqareersoq minutsit 26 qaangiuttut aatsaat apuupput.
- Angerlarsimaffeqanngitsorpassuit oqaluttuartareerput politiinut ambulancenulluunniit sianeraluaraangata takkunneq ajortut, Sofie Bay-Petersen Ritzauimut oqarpoq.
Angerlarsimaffeqanngitsut peqatigiiffiisa pitsanngorsaateqartoqarnissaa pisariaqartippaat, aamma assingusumik ukiup affaa matuma siorna pisoqarpoq.
- Pitsanngoriaateqartoqarsimanngilaq. Taamatut pisoqaqqinnera annilaarnarpoq. Arlaleriarluni taamaattoqartareerpoq, soorlu ilikkarneqarsimassagaluartoq,Sofie Bay-Petersen, Sandimeersoq, oqarpoq.