Peqataasut 9.867 km maannamut pisussimavaat
Kalaallit Nunaanni Timersoqatigiit Kattuffiat najukkani unammisitsinera iluatsilluarpoq. Illoqarfiit nunaqafiillu suli unammeqataasinnaapput. Unammersuarnermi aatsaat unnuaru nalunaaqutaq 00:00 naammassineqassaaq. Kangerlussuaq maannamut siuttuuvoq.
Kangerlussuarmi innuttaasut katillugit 1.737 kilometerit maannamut pisussimavaat. Kalaallit Nunaanni Timersoqatigiit Kattuffiata aaqqissuussaa maannamut iluatsilluarpoq. Maaji Nuan naggaserluarluniarlugu kattuffik najukkani unammisitsivoq.
- Pisunnerit arpannerillu katikkaanni Nepal-imi Himalaya-p qeqqarsuinut pisussimavugut. Katillugit 9.867 kilometerit. Torrak, taama kattuffik Facebookimi ilaatigut allappoq.
Inuit eqeersimaartut
Najukkani assigiinngitsuni innuttaasut eqeersimallutik unammeqataapput. Uummannamilu innuttaasut maannamut siuttuni tulliupput, taakkuali innuttaasut agguaqatigiisinnerini eqeersimaarnerpaapput.
Innuttaasummi 163-it ataatsimoorlutik Uummannami pisoqatigiisimapput. Tamannalu kattuffimmiit tanngassimaarutigineqarpoq.
- Nunaqarfinni illoqarfinnilu piumassuseqarluartoqartoq malunnaqaaq. Sumiiffiit ilaanni pisuttuaqatigiittartut eqimattarujussuit katersorneqarsimasut takullugit tupinnaqaaq. Uummannami pisuttuaqatigiittartut inuit 163-it angusimavaat. Tupinnaannartumik pimoorussinerit ataqatigiinnerillu takussaapput. Takullugit killitsinnartumik nuannaajummernarpoq, Kalaallit Nunaanni Timersoqatigiit Kattuffiat allappoq.
Suli unammeqataasinnaavutit
Unammeqataanermi suli pisunnitit nalunaarsornissaat naammattoorsinnaavat. Uani immersuigit.
Illoqarfiup/nunaqarfiup inuttussusaa kiisalu inuup ataatsip agguaqatigiisillugu kilometerit qassit pisussimanera naatsorsuinermi aallaavigineqassasoq, kattuffiup ilisimatitsissutigaa.