Akisooq

Pensionisianut aaqqissuusseqqinneq akisunerusoq

Siusinaartumik pensionisianut aaqqissuusseqqinnerup eqqunneqarnera ilimagisamit akisunerusoq

Siusinaarlutik pensionisiallit amerlanerusut sulilissapput

Siusinaartumik pensiuunisianut aaqqissuusseqqinnermik suliat naammassiniarneqarneri Naalakkersuisut naatsorsuutigisaannit pisariunerupput. Kommuninut maanna aningaasanik saniatigut tunniussisoqalerpoq.

Atuaruk: Siusinaartumik sulisinnaajunnaarnersiutillit sulilissapput

Siusinaartumik pensionisiallit tamarmik nalilersorneqaqqinnissaanni, siusinaartumik pensionisianut aaqqissuusseqqinnerup kinguneraa. Siusinaarlutik pensionisiallit 3.000-t annikinnerusumik suli sulinissaminnut periarfissaqarnersut kommunit misissussavaat. Tamannalu nalilersueqqinneq pisariuvoq.

Atuaruk: Aaqqissuusseqqereererup kingorna: 151-it pisartakkatik annaavaat

Sullisisut amerlanerusut
Kommunip ilisimatitsissutigaat suliat naammassiniarlugit sullissisunik amerlanerusunik atorfissaqartitsillutik. Maannalu ikiorsiisoqalerpoq. Aningaasaliissutaareersut saniatigut aningaasanik 6 millionit koruuninik ukiunut marlunut tulliuttunut Naalakkersuisut aningaasaqarnermut ataatsimiititaliamut qinnuteqarput, taannalu akuerineqarpoq.

- Aaqqissuusseqqinnerup pilersaarutaasutut siunertaasutullu atuutsinneqarnissaa qulak-keersinnaassagutsigu, kommunit siusinaartumik pensionisiat pillugit suliaqarnissaminni naammattunik sulisussaqarnissaat pingaartorujussuuvoq, isumaginninnermut naalakkersuisoq Martha Lund Olsen (S) oqarpoq.

Aningaasaliisoqaqqinnerata kinguneraa, kommunit katillugit sullissisunik 6-8-nik ukiuni tulliuttuni atorfinitsitsisinnaalernerat. Aaqqissuusseqqinnissap juulip aallaqqaataanit atuutilerneranit kommunit sullissisunut arfineq-pingasunut aningaasaliiffigineqarput.

Atuaruk: Naalakkersuisooqatigiit aaqqissuusseqqinnerat siulleq

Sanngiinnerit annaasaqangajattut
Suliassat annertunerunerisa saniatigut aamma siusinaartumik pensionisiallit sanngiinnerit ikaarsaarnermi annaasaqaratarsinnaanerat paasineqarpoq. Tassanilu sukkanerusumik sulinissaq pisariaqarsimavoq.

- Ikaarsaariarnermi siusinaartumik pensionisialinnut sanngiinnerpaanut annaasaqaataanissaa siunertaanngilaq. Pingaartinneqarportaaq siusinaartumik pensionisiallit sulisinnaassuseqartut sulisinnaassutsiminnik atuinissaat, taamatullu inuiaqatigiinni akuunerulernissaat kommunini immikkut ittumik sulissutiginissaat, Martha Lund Olsen naqissusiivoq.

Aaqqissuusseqqinnerup siunertaraa, siusinaarlutik pensionisiallit sulinissaminnut pisinnaasut sulilersinneqarnissaat.

Powered by Labrador CMS