Pele: Siulittaasunngorniunneq akuliunnermut tunngaviuvoq
Pele Brobergip Partii Naleqqameersup qularutiginngilaa, Nukissiorfiit sulisunik 13-inik soraarsitsinissamik pilersaarutaat Kim Kielsenip unitsissimassagaa, Naalakkersuisut Siulittaasuattut Siumumi sulittaasunngorniuttoqalerpat nukittunerusutut inissisimanissani anguniarlugu.
Nukissiuuteqarnermut Naalakkersuisup Steen Lyngep tallimanngormat ualilluinnartoq tusagassiorfinnut nalunaarutigaa, Naalakkersuisut sulisunik 13-inik soraarsitsiniarneq unitsikkallarsimagaat.
Steen Lynge sapaatiummat Sermitsiaq.AG-mit apersornerami imatut nassuiaateqarpoq:
- Atorfiit atorunnaarsinneqarniartut najugaqarfinni mikinerniillutillu illoqarfinni mikinerusuniipput. Atorfillu ataaseq atorunnaarsinneqaraangat, najukkami aningaasaqarneq sakkortuumik eqqorneqartarpoq, taamaammat atorfinnut sunniuteqanngitsumik allanik periarfissarsiorsimanissaq pingaaruteqarpoq.
Nassuiaat akuersaarneqanngitsoq
Pele Brobergip nassuiaat tamanna akuersaanngilaa, pisortat aqutsisoqarfiisa, ingerlatseqatigiiffiit namminersortitat suliffeqarfiillu Namminersorlutik Oqartussanit pigineqartut pitsaanerpaamik sapinngisamillu akikinnerpaamik ingerlatsisussaanerat pingaaruteqarmat – tassa suliffinnilluunniit tamanna naleqaraluarpat.
- Partii Naleraq pisariillisaanernut akuersaartuuvoq, suliffinnik naleqaraluarpalluunniit. Pisariillisaanermi nagaataatigut Kalaallit Nunaanni inuiaqatigiinnut iluaqutaasussaavoq aamma atugarissaarnermut aningaasassaqanerunissamik qulakkeerinnittussaavoq, Pele Brobeg Sermitsiaq.AG-mut nassuiaavoq.
Taassuma oqaatigaa, Tele Greenland piffissami sivisuumi pisariillisaasimasoq, atorfiit arlalinnik ikilisissimasi, tamatummunnga peqatigitillugu ingerlatsinini ajornaannerulersissimallugu, sullitaallu tamatuma malitsigisaanik internet aqqutigalugu imminnut sullissinnaanerulersimallutik.
Assigiinngissitsisoqassanngitsoq
- Psiariillisaanerilli inuiaqatigiinni inuit ilaannut kingunerlutsinneqassanngillat, Pele Broberg erseqqissaavoq, taamaammallu Nukissiorfiit imminut sullissinnaanermik siuarsaaniarlutik digitaliseeriinerat ilalersinnaanngilaa, tassa sullitat takkullutik saaffiginnissinnaajunnaartillugit suliffinnik 13-inik atorunnaarsitsiniarnerat pissutigalugu. Innuttaasummi digitalinik atuinngitsut akitsuutitigut akiliisinneqartarnissaat pilersaarutaammat.
-Pisortat allaffeqarfiisa allaffeqarfiillu namminersortitat sullitat, pingaartumik utoqqaat smartphoneseqanngitsut internertsimillu atuisuunngitsut sullinneqarnissaat qulakkeerniarlugu, suleqatigiinnissaannik Naalakkersuisut sooq piumasaqaateqannginnersut paasisinnaanngilaa. Innuttaasummi taakku artukkerneqassapput, Nukissiorfiit immersugassanik atuinermi akileeqqusisalerpata, Pele Broberg erseqqissaavoq.
Akuliuttussaannginneq naak
Pele Brobergip paasisinnaannginnerarpaa, Demokraatini ilaasortap (Steen Lynge) taamatut nassuiaammik saqqummiussisinnaanera. Pingaartumik naalakkersuinikkut akuliuttoqannginnissaanik partii siuttuulluni oqaaseqartarmat.
- Demokraatit Kim Kielsenimut akerliullutik oqaaseqarnissaminnut sanilliullugu Naalakkersuisuni issiarusunnerupput, Kim Kielsenimi siulittaasunngorniunnermut peqataangajalerpoq, tassanilu partiimi siulittaasuuginnarnissaanut aalajangiisuusinnaammat illoqarfinni assigiinngitsuni qanoq taasisoqarsinnaanera, Pele Broberg naliliivoq.