Pelep piumasaa: Narsarsuarmiut taarsiivigineqarlik heliportiliornissarlu unitsillugu
Partii Naleraq sinnerlugu Inatsisartuni ilaasortap Narsarsuup matuneqarnissaa, taamatullu najugaqartut taarsiivigineqarnissaat, mittarfiup heliportinngortinneqarnissaaniit kissaatigineruaa.
Qaqortumi mittarfik atulerpat sooq Narsarsuaq heliportinngortinneqassava? Kikkut Narsarsuarmi najugaqassagamik, najugaqartoqarumappallu qanoq inuuniuteqassagamik?
Suleqatigiissitap Narsarsuaq pillugu nalunaarusiaa atuareerlugu, Pele Broberg apeqqutissanik ulikkaarpoq.
Ullormut angalasut arfineq-pingasut
Taanna isumaqarpoq isumatusaarnerussasoq Narsarsuaq inuttalerneqanngitsumik helistoppinngortinneqarpat. Mittarfimmi heliportinngortinneqassaguni 17 milliuunit koruuninik akeqassaaq, sulisullu qulingiluat sulisorineqassallutik.
- Isumaqarpunga Naalakkersuisut akisussaaffeqanngitsorujussuartut nalunaarusiortitsisimapput. Sooq nunaqarfik heliporteqassava angalasut ullormut tikittartut taama ikitsigitillugit? Taama aningaasartuuteqarnissaq isumatusaarnerunngilaq, Pele Broberg (PN) oqarpoq. Nalunaarusiami inerniliussat ilagaat angalasut Narsarsuarmut aqqusaartartussat agguaqatigiissillugu ullormut arfineq-pingasuusassasut.
Suleqatigiissitap Narsarsuup siunissaa pillugu nalunaarusiaani allaqqavoq Narsarsuaq ullumikkut 126-inik innuttaasoqartoq. Taakkunannga 60-it missaat mittarfimmi sulisuupput.
Narsarsuaq heliportinngortinneqarpat Mittarfeqarfiup sulisut qulit sulisoriinnarnissaat pisariaqartilissavaa. Sulisut nunaqarfiup nukissiuuteqarnera namminneerlutik isumagissavaat. Nunaqarfimmi namminneq illuutillit suliffeqarfiutillillu taarsiivigineqarnissaat Naalakkersuisut aamma itigartitsissutigaat.
Nunaqarfik matuniarli
Pele Broberg isumaqarpoq nunaqarfiup matunissaanut tunngatillugu Naalakkersuisut ersarinnerusumik oqariartuuteqartariaqalersut, taamatullu nunaqarfimmi nalilinnik pigisaqartut taarsiivigineqartariaqartut.
- Narsarsuarmi innuttaasut ukiorpassuarni sullippaatigut angalasinnaaniassagatta. Taama qujaffigiinnarlugit imminiiginnarsinnaanngilagut. Inuinuku oqaluuserigigut, Pele Broberg oqarpoq.
Partii Naleraq sinnerlugu politikeri nassuerpoq takorusunnerusinnaallugu nunaqarfiup matuneqaannarnissaa, Narsarsuarlu inuttaqartinnagu helistoppinngortinneqarnissaa. Taanna isumaqarpoq nunaqarfiup matuneqarsinnaanissaa eqqarsaatigalugu innuttaasut ikiorserneqarunik ingerlariaqqinnissaminnut periarfissagissaarnerussagaluartut.
- Una qularnanngilaq, Naalakkersuisut aamaruutissaqarfimmi Qullissani pisut ilinniarfigisimanngilaat. Maanna politikerit qanga oqartussat iliornerattut maanna iliorput. Innuttaasut pisariaqartikkunnaaramikkit tassa imminiiginnarpaat. Allanngortoqarnerani innuttaasut ikiorneqartussaagaluarput, Pele Broberg naggasiivoq.