Skip to main content

Pele: Naalakkersuisut allanut tusarliusseqqusinnginnermik atornerluipput

Politikkikkut pappialaatit Naalakkersuisut sukkut tamaana allanut tusarliuteqqusaanngitsutut naqissusertarpaat. Tamatuma malitsigisaanik paragraf 37 naapertorlugu apeqqutigineqartartut amerleriarujussuarsimapput. – Allanut tusarliusseqqusinnginneq atornerlunneqarpoq, Pele Broberg erseqqissaavoq.

Nmminersorlutik Oqartussani atorfilittat paragraf 37 naapertorlugu apeqqutinut akissutissarsiniarlutik ukiuni makkunani immikkut ulapputeqarput. Naalakkersuisunut aatsaat taamak apeqquteqartoqarsimatigaaq.

2019-ip 2020-nngornissaanut qaammatit marlungajannguinnanngoraluartut Inatsisartuni politikkerit  paragraf 37 naapertorlugu 342-nik apeqquteqarsimapput.

Agguaqatigiissillugit 274-it

Ukiumut 2018-imut katillugit 339-nik apeqquteqarfiunerpaasimasumut sanilliukkaanni apeqquteqarusuttut amerleriarujussuarsimapput. Ukiuni kingullerni tallimani, tassa 2014-imiit 2018-imut ukiumut agguaqatigiissillugj274-inik apeqquteqartoqartarsimavoq.

Taamatut apeqquteqarususseqalernermut suna pissutaavat? Tamanna Inatsisartuni politikkerinut arlalinnut apeqqutigisimavarput:

Múte B. Egede, IA:

- Tamanna Inatsisartut Naalakkersuisullu suleqatigiinnginnerannut takussutissaavoq. Naalakkersuisut Inatsisartunik ilaatitsinatik silarsuarminnut imminnut mattullutik ingerlatsipput. Taamaammat paasissutissanik pisariaqartinneqartunik pissarserusulluta aamma politikkikkut oqallinnermut innuttaasut peqataatikkusullugit apeqquteqartariaqartarpugut.

Apeqqutigineqarpiarneq ajortut

Apeqqutigineqarpiarneq ajortoqarpoq, IA-mi politikkeri nassuiaavoq:

- Assersuutigalugu aatsitassanut suliaqarfimmut tunngatillugu aperisoqarpallaarneq ajorpoq. Susassaqarfimmut naalakkersuisup akulikitsumik paasissutissiiniarluni ataatsimiisitsisarnera tamatumunnga pissutaasorivara. Naalakkersuisut allat tamanna ilinniarfigisinnaagaluarpaat, Múte B. Egede oqarpoq.

Politikkeri ukiorpassuarni Inatsisartuni ilaasortaasimanermi misilittagartooq imatut nassuiaavoq:

- Politikkikkut nalinginnaasumik suliat aatsaat taamak amerlatigisut Naalakkersuisunit allanut tusarliuteqqusaanngitsut aatsaat misigivara, politikkeri kinaanerminik isertuusserusuttoq nassuiaavoq.

Atornerluisoqartoq

Pele Broberg Partii Naleqqameersoq allanut tusarliusseqqusinnginnerup qanoq atorneqarneranik isornartorsiuinissamut ajornartorsiuteqanngilaq.

- Ajortumik isumaqarani oqaatigineqarsinnaavoq, Naalakkersuisut allantut tusarliusseqqusinnginnermik atornerluisut. Soorlulusooq eqqarsaqqaaratik politikkikkut pappialaatit allanut tusarliunneqartussaanngitsutut naqissusertaraat. Paragraf 37 naapertorlugu apeqquteqartariaqartarnitsinnut tamanna nassuiaatissaavoq, Pele Broberg erseqqissaavoq.

Taassuma assersuutigalugu paasisinnaanngilluinnarpaa, Nunanut Allanut Ataatsimiititaliami isumasioqatigiinnissamut aggersaaneq tusagassiuutitigut naluaarutigineqartoq, isumasioqatigiinneq matoqqasumik ingerlanneqarsimasoq.

-Ajuusaarnarpoq, ammasumik isumasioqatigiittoqarnissaanut, tusagassiortut innuttaasullu susoqarneranik paasisaqarfigisinnaasaannut Demokraatit mattussisimanerat, Pele Broberg oqarpoq.

Danmarkimi ammanerusumik ingerlatsisoqartoq

Múte B. Egede, Partii Naleqqamit aamma tupisineqartumik, allamik assersuuteqarpoq.

- Mittarfimmut Kangerlussuarmullu tunngatillugit isumaqatigiissut aamma allanut tusarliuteqqusaanngilaq. Tamanna tupinnarpoq, Kangerlussuarmut tunngatillugu isumaqatigiissut folketingimi ammalluinnartumik oqaluuserineqartoq takusinnaallugu, IA-mi politikkeri oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER