Skip to main content

Pele: Kim naalakkersuisooqatigeqqissanngilarput

PN-imit peqqissimissutigineqanngilaq ukiup ataatsip matuma siorna naalakkersuisoqatigiinnut Siumumit aqunneqartunut ilaajunnaarsimaneq

Ukiup ataatsip matuma siorna nunami politikkerit pisoqarfioqisunik ulloqarsimapput. Sapaammi septembarip qulingiluaani, qinersisoqarneranit qaammatit sisamat qaangiutiinnartut Partii Naleqqap nalunaarutigaa, naalakkersuisooqatigiinnit Siumumit aqunneqartumit tunuarlutik. Mittarfissat pillugit danskit naalagaaffiannut isumaqatigiissuteqarsimaneq tamatumunnga pissutaatinneqarluni, partiimili siulittaasup Hans Enoksenip erseqqissaatigaa naalakkersuisooqatigiinni 

suleqatigiinniarneq naammagineqartanngitsoq.

- Naalakkersuisooqatigiinnit aninerput sukkulluunniit peqqissimissutigisimanngilarput. Peqqissimissutissaqassagutta, taava aallaqqaammut Kim Kielsenimik tatiginnissimanerput peqqissimissutigisinnaavarput, partiimi nuimanerpaatut politikkeriusut ilaat, Pele Broberg Sermitsiaq.AG-mut oqarpoq.

Kimmimut tatiginninnginneq

Partii Naleraq tunuarmat Siumut Inatsisartuni 

amerlanerussutissaaruppoq. IA qujaannapallappoq, Demokraatillu ikorfartuutaaginnarniarlutik sivisoorujussuarmik isumaqatiginninniarlutik.

- Ajornartorsiutaasoq tassaavoq Kim Kielsenip allanik ilaatitsissanani matoqqasumik aqutseriaaseqarnera. Inuit taassuma ataani naalakkersuisoorusunngillat, oqarpoq Pele Broberg.

- Kim Kielsen siulittaasuutillugu Naalakkersuisunut sukkulluunniit ilanngunnianngilagut. Soorunami Siumukkormiut namminneerlutik partiimi siuttussartik toqqartussaavaat, oqaannarpugulli maanna siuttuusut tatigisinnaanngikkivut.

Akisussaaffeqaqqilernissamut piareeqqaneq

Pele Brobergip erseqqissaatigaa, partiimik naalakkersuisooqatigiinnut ilaaqqinngisaannarnissaa 

takorloorneqarsinnaanngitsoq, akerlianik akisussaaqataarusupput.

- Qinersissoqassappat qinersisoqareerneratigut naalakkersuisoqatigiinnut ilaanissarput anguniagaraarput. Innuttaasut kissaatigippassuk, akisussaaffimmik tigusinissarput qunuginngilarput.

Pele Brobergip siusinnerusukkut oqaatiginikuuaa, Amerikamiut ullumikkut soqutiginninnerat atorluarlugu piaartumik namminersulivinnissamik partiip anguniagaqarnera sulissutigineqarsinnaasoq. Taassuma takorloorpaa ullumikkut naalagaaffeqatigiinneq Danmarkimik isumaqatigiissuteqarluni pituttugaanngitsumik attaveqatigiinnermik taarserneqarsinnaasoq. Tassunga atatillugu partii nunami siuttuunissamut aamma piareeqqavoq.

- Piffissap ilaani Naalakkersuisut siulittaasuattut atorfimmik tigusisinnaanerput anguneqarsinnaanngitsutut isiginngilara. Aammaarlungali erseqqissaatigissavara, apeqqutaasoq kina akisussaaffimmik tigusinissamut innuttaasunit qinigaasimanersoq. Namminersulivinnissarput pillugu suliaqarnitsinni uaguatsinnut suleqataarusuttut suleqatigissavavut, oqarpoq Pele Broberg, partiimik qanoq ingerlanneqarnissaanut oqaasissaqaleraluttuinnartoq.

Siulittaasoq nutaaq?

 Partii Naleraq aappaagu aatsaat tullissaanik ileqquusumik ataatsimeersuassaaq, ataatsimeersuarnissalli siusinnerusukkut pisinnaanera maanna eqqarsaatigineqalerpoq. Pele Broberg siulersuisuni maannakkorpiaq ilaasortaanngilaq, tamanna pineqartup allallu allanngortikkusuppaat.

- Ullumikkut siulersuisuusut qinigaammatali inuusuttut ilinniarluarsimasut arlallit partiimi ilaasortaalersimapput. Inuusuttut taakku partiimi erseqqinnerusumik qanoq 

saqqummilaarnerutinneqarsinnaanerat oqaluuserisarparput, taanna oqarpoq.

Partiimi siulittaasup Hans Enoksenip 2018-imi qinersisoqarmalli arlaleriarluni oqaatigisarsimavaa, partiimi tunuarsimaanerusumik suliaqarsinnaanini 

takorloorluarsinnaallugu. Taamaammat ilisimaneqartutut qinigaarlaaq Pele Broberg aningaasaqarnermut naalakkersuisunngoqqusimavaa, nammineq politikkimut tunngassuteqannginnerusoq, Inatsisartut siulittaasuattut atorfik atorfigilerlugu. Upernaaq folketingimut qineqqusaartoqarmat Pele Broberg tassaasimavoq anguniagassanik saqqummiussisartoq, soorlu aamma Donald Trumpimut tunngatillugu uivertoqarnerani oqaaseqartartuusimasoq.

Taamaammat tupinnassanngilaq, qinersisartut inuusunnerusunik isertitsinissamut piarerpata, Hans Enoksen kinguaariit nikisinneqarnissaannut piareersaassappat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER