Pele: Aap, ministeri eqqortumik oqarpoq
Naalakkersuisut sakkutuunngornissamut misilitsinnissat unitsikkusussimagaat, nunanut allanut naalakkersuisup uppernarsarpaa.
Politikerip Anna Wangenheimip (D) arlaleriarluni apeqqutigisarsimavaa, Kalaallit Nunaanni sakkutuunngornissamut ukioq manna misilitsinnissamut Illersornissaqarfiup taamaatitsiinnarsimaneranut kina akisussaasuunersoq.
Danmarkimi illersornissamut ministerip Trine Bramsenip (Soc.) KNR-mut ilisimatitsissutigisimavaa, misilitsinnissat Naalakkersuisut kissaateqarnerisigut taamaatiinnarneqarsimasut.
Anna Wangenheimip paragraf 37 naapertorlugu nunanut allanut naalakkersuisoq Pele Broberg (N) suliaq pillugu siusinnerusukkut apeqquteqarfigisimavaa.
Pele Brobergip naatsumik akissuteqarnermini oqaatigisimavaa, Naalakkersuisut naalagaaffiup akisussaaffiinut - tassunga ilanngullugu Illersornissaqarfimmut akisussaaffeqanngitsut.
- Apeqqutit apeqqutigineqartutut akissuteqarfigineqartut
Tamatuma malitsigisaanik Anna Wangenheim suli amerlanerusunik apeqquteqarsimavoq, tassa paaserusussimavaa, illersornissamut ministerip Naalakkersuisut kissaateqarnerisigut misilitsinnissat unitsikkallarsimallugit oqarsimanera eqqortuunersoq.
Pele Brobergillu uppernarsarpaa, misilitsinnissat Naalakkersuisut kissaateaqarnerisigut unitsinneqarsimasut:
- Aap, tamanna kissaatinut naapertuuppoq, Pele Broberg Anna Wangenheimimut akissuteqarluni allappoq.
Taassuma erseqqissaatigaa, aallaqqaammuulli eqqortumik akissuteqarsimalluni:
- Taamaattumik apeqqutit apeqqutigineqartutut akissuteqarfigaakka. Illersornissaqarfik Illersornissamullu ministeriaqarfik naalagaaffimmit akisussaaffigineqarput Nalaakkersuisut piginnaatitaaffeqarfiginagillu, pisinnaatitaaffeqarfiginagillu akisussaaffiginngisaat. Taamaakkaluartoq Naalakkersuisut naalagaaffimmi oqartussanut isummaminnik saqqummiillutillu kissaateqarsinnaapput, danskillu ministerianik isumaqatiginninniaqateqarsinnaallutik, Pele Broberg akissuteqaammini ilisimatitsivoq.