Pele sakkutooqarfik pillugu paasissutissat kingorna: Kangerlussuaq pillugu matoqqaneq isornartorsioraa
Naalakkersuisut Kangerlussuup qanoq aalajangiiffiginissaanut, Naalakkersuisunut apeqqutit arlalippassuit qulaajaassapput, politikeri Pele Broberg oqarpoq.
Kangerlussuarmi mittarfiup siunissaa pillugu pingaarutilimmik aalajangiisoqarsimarpasippoq, Pele Broberg isumaqarpoq, taanna §37 naapertorlugu apeqquterpassuaqarluni, Naalakkersuisut qanoq pisoqarnissaanik ammanerunissaannik kaammattuivoq.
Danskit tusagassiorfiata TV2-p Danmarkimi illersornissamut ministereqarfianit allakkiaq tunuliaqutigalugu, mittarfiit nutaat ammarpata Illersornissaqarfik nunaqarfimmi sakkutooqarfeqalerniartoq oqaluttuarineqarnerata kingorna, taama oqariartuuteqartoqarpoq.
Illersornissaqarfiup siunertarisaa ukiuni arlalinni politikerinit ilisimaneqartoq, Pele Broberg oqarpoq, taamaattumillu Nuummi mittarfiup atlantikukkut angallanneq ukiaanerani 2024-mi tiguppagu, nunaqarfiup qanoq pineqarnissaanik Naalakkersuisut isummaminnik nalunaaruteqartariaqarnerarpai.
- Nutaarsiassaanngilaq
Broberg Nunanut Allanut Sillimaniarnermullu Politikkimut Ataatsimiititaliamut ilaasortaavoq, ataatsimiititaliallu allakkat takusimasaasa imarisai oqaluttuarisinnaanagit oqarpoq, kisianni uku oqaatigisinnaavai:
- Illersornissaqarfiup kissaatigisaa nutaarsiassaanngilaq. Illersornissaqarfiup Kangerlussuaq qanoq piniarneraat ilisimanagu Naalakkersuisuni politikerit taarserartut taamaattoq oqaatigiuarpaat. Kisianni Illersornissaqarfik sakkutooqarfimmik kissaateqartoq isertuussaanikuunngilaq, Pele Broberg Sermitsiaq.AG-mut oqarpoq.
Taamaattumik Naalakkersuisut nassueruteqaqqullugit kaammattuivoq, mittarfiillu nutaat ammarpata Kangerlussuaq atorneqannginnerulissasoq Aningaasanut inatsimmi atuarneqarsinnaasoq, taanna isumaqarpoq:
Mittarfissuarmut aningaasanik piumanngitsut
- Naalakkersuisut ukiumut 105 mio. kr-inik Mittarfeqarfiit A/S kiffartuussinissamut isumaqatigiissutaanut qinnuteqartoqarpoq. Tamanna annikinnerungaatsiarpoq ukiumut naatsorsuutaasunik 158 mio. kr.-inik Kangerlussuaq mittarfittut ammaannassappat, Pele Broberg oqarpoq.
Mittarfeqarfinnut tunngatillugu Namminersorlutik Oqartussat naatsorsuinerat naapertorlugu, Kangerlussuup nunatta iluani mittarfeqarfinngortinneqassappat, tapiissutinik 105 mio. kr.-inik pisariaqartitsiffiusussaavoq.
Atlantikukkut angallassisarnermut atorneqaannassappat, ukiumut saniatigut 53 mio. kr.-inik pisariaqartitsiffiussaaq.
Kangerlussuup siunissaa pillugu Naalakkersuisunit oqaaseqartitsinissaq Sermitsiaq.AG-p sulissutigaa.
