Pele Naleqqami siulittaasuuginnassaaq: Tapersersorneqarnini nuannaarutigigaa
Sapaatip akunnerata naanerani ileqquusumik ataatsimeersuartoqarnerani Pele Broberg siulittaasutut qinerneqaqqippoq. Ileqqoreqqusat allannguuteqarneranni siulersuisuunerit nutaartaqalerput.
Ukiorpassuarni partiimi siulittaasup pilersitseqataasullu Hans Enoksenip inuttut atukkaminik pissuteqartumik tunuarnerata kingorna, juunimi 2022-mi immikkut ataatsimeersuartoqarnerani politikeri Pele Broberg Naleqqami siulittaasunngorpoq.
Sapaatip akunnerata naanerani Naleraq ileqquusumik ataatsimeersuarpoq, Pele Brobergilu qinigaaqqippoq, taassumalu partiimi tunuliaqutaasunit tapersersorneqarnini nuannaarutigaa:
- Siulittaasutut qinigassanngortissallunga siusinaarlunga nalunaarutiginikuunngilara. Allanik akisussaaffimmik tigusinissamik soqutiginnittoqarnersoq takoqqaarusukkakku. Kisianni tunuliaqutaasut isumaqatigiissut ingerlaqqinnissara kissaatigaat, Pele Broberg, Sermitsiaq.AG-mut oqaluttuarpoq.
Ileqqoreqqusat allanngornerisigut siulersuisuunerit amerlineqarput
Siulittaasup qinerneqaqqinnerata saniatigut Jens Napãtôk’ siulittaasup tulliatut qinigaaqqippoq. Knud Fleischer aaqqissuussaanikkut siulittaasup tulliatut taaguuteqarsimasumi qinerneqarpoq. Atorfik taanna ataqatigiissaarisutut atulersinneqarpoq, tunuliaqutaasunut attaveqarnermik suliaqartussaalluni, Pele Broberg oqaluttuarpoq.
Naleqqap ileqqoreqqusat ima allanngortippaat, partiip Inatsisartunut ilaasortaat siulersuisuunernut ilaasortanngortinneqarlutik. Tamatuma kinguneranik Emanuel Nûko aamma Paneeraq Olsen siulersuisuni ilaasortanngorput. Paneeraq Olsenili qaammatip matuma naalernerani tunuassaaq, Qeqqata Kommuniani atugarissaarnermut pisortatut 1. juli atorfittaartussaagami.
Tamatuma saniatigut siulersuisut ataatsimik ilaneqarput, Anthon Frederiksen, Kirsten Fencker aamma Juno Berthelsen qinigaaqqittut, Dorthe C. Christiansen siulersuisuunerit sisamaattut ilannguppoq.