Pele kamappoq: Mittarfiit pillugit paasissutissaq pingaarutilik kalerriutigineqanngilaq

Naalakkersuisut danskit illersornissaqarfiata Kangerlussuarmi mittarfiup atornissaanut kissaateqarneranik paasissutissat kalerriutigisimanngimmatigit, Partii Naleqqameersoq Pele Broberg mamiatsaqqasorujussuuvoq.

Danskit illersornissaqarfiata Kangerlussuarmi mittarfiup atornissaanut isumaliutersuuteqarnerat pillugu, Naalakkersuisut siornali decembarimi paasisaqarput. Sapaatip-akunneri arlaqanngitsut matuma siornatigut mittarfiliortiternissamut pilersaarut Inatsisartuni amerlanerussuteqartut akueraat.

Nunanut allanut naalakkersuisoq Ane Lone Bagger paragraf 37 naapertorlugu apeqqummut Pele Brobergimut akissummini marlunngornermi ilisimatitsissutigaa, danskit illersornissaqarfiannit saaffiginninneq siulleq decembarip qiteqqunnerani pisoq.

Pisortatigoortumik saaffiginninneq

Danskit naalakkersuisuisa pisortatigoortumik saaffiginnissutaa 2019-imi februarimi Naalakkersuisunit tiguneqarmat, taanna akissummini allappoq – ullulernaguli.

Aatsaat marsip 21-anni 2019-imi Ane Lone Baggerip tusagassiuutinut nalunaarut, tassani Illersornissaqarfiup Kangerlussuarmiinnissani kissaatiginninneranik ilisimatitsisoq nassiuppaa. Tusagassiiutinut nalunaarut uani takuuk.

- Paasissutissat kalerriutigineqannginnerisigut aalajangiiffissatut siunnersuummik nassiussisinnaatitaasimanngilagut, taanna upernaakkut ataatsimiinnermi suliarineqarsinnaassagaluarpoq, Pele Broberg, Sermitsiaq.AG-mut taama oqarpoq.

Aalangiinermut tunngaviusoq allanngortoq

Kangerlussuarmi mittarfik attatiinnarneqassappat, mittarfinnut nutaanut aalajangiinermut tunngaviusoq allanngorujussuarneqarsimasoq, taanna isumaqarpoq.

- Mittarfiliortiternissamut pilersaarummi Kangerlussuup matuneqarnissaa piumasaqaataanikuuvoq. Mittarfiup ammatinneqarnissaa maanna pisussaaffiginiarneqarpasilerpoq, Pele Broberg oqarpoq.

Apeqquteqaat tunngavigalugu oqallitsitsineq

Maanna upernaakkut ataatsimiittoqarnerani apeqquteqaat tunngavigalugu oqallitsitsiniarsariniarpoq.

Powered by Labrador CMS